নিয়মীয়া বাৰ্তা, ১৩ অক্টোবৰঃ পঢ়া–শুনাত সফলতা লাভ কৰিবলৈ হ’লে সৰস্বতী দেৱীক ‘পতাব’ লাগিব দেৱী সন্তুষ্ট হ’লে শিক্ষার্থীৰ কপাল ফুলিব৷ কালি উত্তৰাখণ্ডৰ বিজেপি বিধায়ক বংশীধৰ ভগতে শিক্ষার্থীসকলক উদ্দেশ্যি দিয়া ভাষণত এই কথা উল্লেখ কৰে৷ ৰাজ্যৰ প্রাক্তন মন্ত্রীগৰাকীৰ এনে মন্তব্যত তীব্র বিতর্কৰ সৃষ্টি হৈছে৷ বিভিন্ন মহলে নিন্দা কৰিছে বিধায়ক ভগতক৷ কালি ৰাজ্যখনৰ হল্ডৱানিত এক অনুষ্ঠানত অংশগ্রহণ কৰি এই মন্তব্য কৰে ভগতে৷ অনুষ্ঠানত উপস্থিত থকা দর্শকৰ অধিকসংখ্যকেই আছিল ছাত্রী৷ শিক্ষার্থীসকলক সফলতাৰ মন্ত্র দিবলৈ গৈ বর্তমানৰ বিধায়কগৰাকীয়ে সৰস্বতী দেৱীক পটাব লাগে বুলি কৰা মন্তব্যক বিবেকশূন্য বুলি বিভিন্ন মহলে আখ্যা দিছে৷