নিয়মীয়া বাৰ্তা ১১ ফেব্ৰুৱাৰীঃ ৰক্তক্ষয়ী গৃহযুদ্ধৰ সময়ত আফগানিস্তানৰ পৰা গৈ পাকিস্তানৰ পেছোৱাৰত শৰণার্থীৰ জীৱন কটাবলগীয়া হৈছিল ছামিয়া ট’ৰা নামৰ কিশোৰীজনীয়ে৷ আনকি পেছোৱাৰতো ১৯৯০ৰ দশকটোত সঘনে বোমা আক্রমণৰ সন্মুখীন হ’বলগীয়া হৈছিল ছামিয়াৰ পৰিয়াল৷ জীৱন এক অনিশ্চিত অন্ধকাৰত নিমজ্জিত হৈ পৰিছিল৷ ছামিয়া আৰু তেওঁৰ পৰিয়ালৰ সদস্যসকলে প্রতিটো ক্ষণতে মৃত্যুৰ আশংকাত ভুগিবলগীয়া হৈছিল৷ সেই ছামিয়াই ২০০২ চনত পুনৰ কাবুললৈ গৈ বিদ্যালয়ত অধ্যয়ন কৰিবলৈ লয়৷ শেহতীয়াকৈ ২২ বছৰীয়া ছামিয়াই ৰোডেছ স্ক’লাৰ হিচাপে বিশ্বৰ আটাইতকৈ প্রাচীন স্নাতকোত্তৰ শিক্ষাৰ জলপানি লাভ কৰিবলৈ সক্ষম হৈছে৷ আমেৰিকাৰ ইণ্ডিয়ানা প্রদেশৰ আর্লহাম কলেজৰ ছাত্রী ছামিয়াই ১০২গৰাকী শিক্ষার্থীৰ ভিতৰত এই জলপানি লাভ কৰাৰ পিছতে শৰণার্থীৰ পৰা স্নাতকোত্তৰ ডিগ্রীলৈ যুৱতীগৰাকীৰ সংগ্রামী জীৱন পৰিক্রমা চর্চাৰ বিষয় হৈ পৰিছে সমগ্র বিশ্বত৷