নিয়মীয়া বাৰ্তা ২৮ ফেব্ৰুৱাৰীঃ দক্ষিণৰ ছুপাৰষ্টাৰ ৰজনীকান্ত আৰু বিশ্বপ্রসিদ্ধ বিয়েৰ গ্রিলছৰ বন্দীপুৰ বনাঞ্চলত চিত্র গ্রহণ কৰা ডকুমেণ্টৰীৰ প্রথম এপিছড অহা ২৩ মার্চত ডিচক’ভাৰী চেনেলযোগে প্রচাৰ হ’ব৷ আজি ডিচক’ভাৰী চেনেলে থালাইভা অন ডিচক’ভাৰী শীর্ষক ট্রিজাৰ মুকলি কৰি অহা ২৩ মার্চত প্রথম এপিছড প্রচাৰ কৰা হ’ব বুলি আনুষ্ঠানিকভাৱে ঘোষণা কৰিছে৷ প্রধানমন্ত্রী নৰেন্দ্র মোদীৰ পাছত দ্বিতীয়গৰাকী ভাৰতীয় হিচাপে ছুপাৰষ্টাৰ ৰজনীকান্তে গভীৰ বনাঞ্চলত দুঃসাহসিক ডকুমেণ্টৰীত অংশ লৈছে বিয়েৰ গ্রিলছৰ সৈতে৷ ইতিমধ্যে এই ডকুমেণ্টৰীখনক লৈ ব্যাপক চর্চা আৰম্ভ হৈছে৷ অহা ২৩ মার্চৰ সন্ধিয়া ৮ বজাত ডিচক’ভাৰী চেনেলে দুঃসাহসিক এই ডকুমেণ্টৰীখনক লৈ উৎসাহী হৈ আছে ছুপাৰষ্টাৰ ৰজনীকান্তো৷ দ্য ৱাইল্ড উইথ বিয়েৰ গ্রিলছ’ বুলি টুইটাৰযোগে ঘোষণা কৰি ৰজনীকান্তে তেওঁৰ এই দুঃসাহসিক অভিযান চিৰস্মৰণীয় অভিজ্ঞতা হৈ থাকিব বুলি কয়৷