১২ দিনীয়া পদক্ষেপত দেশৰ ৰাজধানীত সম্পন্ন হ’ল ৪.৪৫ লাখ ক’ভিড টেষ্ট

নিয়মীয়া বাৰ্তা ১৯ জুলাইঃ দেশৰ ৰাজধানী চহৰ দিল্লীত ভয়াৱহ ৰূপ ধৰা ক’ৰোনা পৰিস্থিতি শেহতীয়াকৈ কিছু নিয়ন্ত্রণত৷ সামাজিক সংক্রমণত বিধ্বস্ত হৈ পৰা দিল্লীত যোৱা জুন মাহত পৰিস্থিতি এনে পর্যায় পাইছিলগৈ যে ক’ৰোনাৰ বিৰুদ্ধে চলা যুঁজত একপ্রকাৰ হাত দাঙি দিছিল দিল্লীৰ চৰকাৰে৷ ভয়ংকৰ পৰিস্থিতিৰ দিশে গতি কৰা দিল্লীক উদ্ধাৰৰ বাবে অৱশেষত আগবাঢ়ি আহিবলৈ বাধ্য হ’ল কেন্দ্রীয় চৰকাৰ৷ প্রধানমন্ত্রী নৰেন্দ্র মোদীৰ পৰামর্শমর্মে কেন্দ্রীয় গৃহমন্ত্রী অমিত শ্বাহে ক’ৰোনাৰ বিৰুদ্ধে চলা যুঁজৰ নেতৃত্ব লৈ যোৱা এমাহত দিল্লীৰ পৰিৱেশ নিয়ন্ত্রণ কৰাই নহয়, সামাজিক সংক্রমণ প্রতিৰোধতো যথেষ্ট সফলতা দেখুৱাবলৈ সক্ষম হ’ল৷ উল্লেখ্য যে জুন মাহৰ শেষভাগত দিল্লীৰ উপ–মুখ্যমন্ত্রী মনীষ শিশোদিয়াই জুলাই মাহত ৰাজধানী চহৰখনত ক’ৰোনা আক্রান্তৰ সংখ্যা ৫.৫ লাখ অতিক্রম কৰিব বুলি মন্তব্য কৰিছিল৷ কার্যতঃ ক’ৰোনা প্রতিৰোধত একপ্রকাৰ পৰাজয়বৰণ কৰা দিল্লী চৰকাৰৰ এনে পৰিস্থিতি চম্ভালি ল’লে কেন্দ্রীয় মন্ত্রী অমিত শ্বাহে৷ যোৱা ১৫ জুনত ক’ৰোনা প্রতিৰোধৰ দায়িত্ব লৈ এমাহৰ পাছত অর্থাৎ ১৫ জুলাইত পৰিৱেশ সলনি কৰি দিয়াই নহয়, দিল্লীত এতিয়া যথেষ্ট নিয়ন্ত্রণত ক’ভিড–১৯৷

উল্লেখ্য যে যোৱা ১৫ জুনত দিল্লীত পৰিস্থিতি চম্ভালিবলৈ কেন্দ্রীয় গৃহমন্ত্রীজনে গ্রহণ কৰে ১১টা বিশেষ পদক্ষেপ৷ এই পদক্ষেপসমূহৰ অংশস্বৰূপে অমিত শ্বাহে অনুষ্ঠিত কৰিছিল এখন বিশেষ বৈঠকৰ৷ কেন্দ্রীয় চৰকাৰ, ৰাজ্য চৰকাৰ আৰু দিল্লী পৌৰসভাৰ বিষয়ববীয়া উপস্থিত থকা এই বৈঠকতে ক’ৰোনাৰ সামাজিক সংক্রমণ প্রতিৰোধৰ এলানি ব্যৱস্থা গ্রহণ কৰা হয়৷ এই বৈঠকৰ সমান্তৰালকৈ অমিত শ্বাহে সকলো ৰাজনৈতিক দলৰ সৈতে বৈঠক অনুষ্ঠিত কৰি গ্রহণ কৰে এলানি পৰামর্শ৷

ইফালে, গৃহমন্ত্রীগৰাকীৰ নির্দেশত স্বাস্থ্য সেৱাৰ দিশটো তদাৰক কৰিবলৈ গঠন কৰা হয় এখন বিশেষ কমিটী৷ নিটি আয়োগ, এইমছ আৰু কেন্দ্রীয় চৰকাৰৰ স্বাস্থ্য সচিবক লৈ গঠন কৰা কমিটীখনে যোৱা সময়ছোৱাত আক্রান্ত লোকৰ পৰীক্ষা, চিকিৎসাৰ ক্ষেত্রত বিশেষ পদক্ষেপ গ্রহণ কৰে৷ তাৰ ফলস্বৰূপে ১৫ জুনৰ পৰা ১৫ জুলাইলৈ দিল্লীৰ পৰিৱেশ যথেষ্ট সলনি কৰা হয়৷ ১ এপ্রিলৰ পৰা ১৪ জুনলৈ প্রতিদিনে দিল্লীত পৰীক্ষা কৰা হৈছিল ২,৮০০জনক৷ সেই অনুসৰি এই সময়ছোৱাত মুঠ পৰীক্ষা সম্পন্ন হৈছিল ২,৯০,৫৯২জন লোকৰ৷ ইয়াৰ বিপৰীতে ১৫ জুনৰ পৰা ১৫ জুলাইলৈ প্রতিদিনে ২০ হাজাৰ লোকক পৰীক্ষা কৰা হয়৷ ফলত এমাহতে ৪,৪৫,৮৪৪জন লোকৰ ক’ভিড পৰীক্ষা সম্পন্ন হয়৷

আনহাতে, ব্যক্তিগত লেবৰেটৰীত ক’ভিড পৰীক্ষাৰ বাবদত পূর্বে ব্যয় হৈছিল ৪,৫০০ টকা৷ এই ব্যয়ৰ পৰিমাণ ২,৪০০ টকালৈ হ্রাস কৰা হয়৷ ১৪ জুনলৈ দিল্লীত ক’ৰোনা আক্রান্তৰ বাবে খালী থকা বিছনাৰ সংখ্যা আছিল ৯,৯৩৭খন৷ এই সংখ্যা ১৫ জুলাইৰ পাছত ৩০ হাজাৰলৈ বৃদ্ধি কৰা হয়৷ ইয়াৰে ৫০৩টা ৰে’লৰ দবাত ৮ হাজাৰ বিছনা, সেনা, চি আৰ পি এফৰ জৰিয়তে ১,০০০ বিছনা যোগাৰ কৰা হয়৷ আনহাতে, আই টি বি পিয়ে ১০ হাজাৰ বিছনাৰ ব্যৱস্থা কৰে৷ ইফালে, ১৫ জুনৰ পূর্বে ভেণ্টিলেচন নোহোৱাকৈ আই চি ইউত থাকিলে ব্যয় হৈছিল ৪৩ হাজাৰ৷ এই ব্যয় ১৩ হাজাৰৰ পৰা ১৫ হাজাৰলৈ হ্রাস কৰা হ’ল৷ তদুপৰি আই চি ইউ আৰু ভেণ্টিলেচনত থকা ৰোগীৰ ব্যয় প্রতিদিনে ৫৪ হাজাৰৰ পৰা ১৮ হাজাৰলৈ হ্রাস কৰা হ’ল৷ দিল্লী চৰকাৰক কেন্দ্রীয় চৰকাৰে এই সময়ছোৱাত ৫০০ অক্সিজেন চিলিণ্ডাৰ, ৪৪০টা ভেণ্টিলেটৰ, ১০ হাজাৰ অক্সিমিটাৰ আৰু এম্বুলেঞ্চৰ সংখ্যা বৃদ্ধি কৰিলে৷ দিল্লীৰ ঘৰে ঘৰে ক’ৰোনা পৰীক্ষা কৰিবলৈ গঠন কৰা হ’ল বিশেষ টীম৷ এই কার্যসূচীত ৭৫৫জন স্বাস্থ্য সেৱক, ২৮টা এন জি অ’ আদিয়ে অংশ লৈ ঘৰে ঘৰে স্বাস্থ্য পৰীক্ষা সম্পন্ন কৰে৷

আনহাতে, হোম আইছ’লেচনৰ ক্ষেত্রত বিশেষ ব্যৱস্থা গ্রহণ কৰি চিকিৎসালয়ৰ পৰিৱর্তে লক্ষণ নথকা লোকক আইছ’লেচন হৈ থাকিবলৈ অনুমতি দিয়া হ’ল৷ দিল্লীৰ নির্দিষ্ট এলেকা তথা অঞ্চলত নির্মাণ কৰা হ’ল ক’ভিড চেণ্টাৰ৷ যাৰ দ্বাৰা আক্রান্তসকলক পৰীক্ষা তথা চিকিৎসা প্রদান কৰিব পৰা যায়৷ দিল্লীৰ জটিল পৰিৱেশৰ মাজত ক’ৰোনাত আক্রান্ত হৈ মৃত্যু হোৱা লোকৰ শেষকৃত্য সম্পন্ন হোৱাৰ ক্ষেত্রত যথেষ্ট সমস্যা সৃষ্টি হৈছে৷ কিন্তু শেহতীয়াকৈ এই সমস্যা আঁতৰ কৰি ক’ভিডত মৃত্যু হোৱা লোকৰ প্রট’কল অনুসৰি শেষকৃত্য সম্পন্ন কৰা হৈছে৷