নিয়মীয়া বাৰ্তা, ২২ এপ্রিলঃ ক’ভিড–১৯ ভেকচিনৰ নাটনি হোৱা বুলি কেইবাখনো ৰাজ্যই কেন্দ্রীয় চৰকাৰৰ বিৰুদ্ধে অভিযোগ উত্থাপন কৰাৰ সময়তে দেশজুৰি ২৩ শতাংশ ক’ভিড ভেকচিন অপচয় হোৱাৰ তথ্য পোহৰলৈ আহিছে৷
তথ্য জনাৰ অধিকাৰ আইনৰ অধীনত ৰাষ্ট্রীয় সংবাদ মাধ্যমে প্রকাশ কৰা অনুসৰি, ১১ এপ্রিললৈকে দেশজুৰি ব্যৱহূত হোৱা ভেকচিনৰ ভিতৰত ২৩ শতাংশ অপচয় হৈছে৷ আৰ টি আইৰ তথ্যত প্রকাশ পোৱা মতে ১১ এপ্রিললৈকে ১০.৩৪ কোটি ভেকচিন ড’জ ব্যৱহাৰ কৰা হৈছে যদিও ৪৪.৭৮ লাখ ভেকচিন ড’জ অপচয় হৈছে৷
দেশৰ ৰাজ্যসমূহৰ ভিতৰত ভেকচিন অপচয়ৰ শীর্ষত আছে তামিলনাডু, হাৰিয়ানা, পঞ্জাব, মণিপুৰ আৰু তেলেংগানা৷ আনপিনে এটাও ভেকচিন ড’জ অপচয় নোহোৱা ৰাজ্যকেইখন হৈছে– কেৰালা, পশ্চিমবংগ, হিমাচল প্রদেশ, মিজোৰাম, গোৱা, দমন আৰু ডিউ, আন্দামান নিকোবৰ দ্বীপপুঞ্জ আৰু লাক্ষাদ্বীপ৷
তামিলনাডুত ১২.১০ শতাংশ, হাৰিয়ানাত ৯.৭৪ শতাংশ, পঞ্জাবত ৮.১ শতাংশ, মণিপুৰত ৭.৮ শতাংশ আৰু তেলেংগানাত ৭.৫৫ শতাংশ ক’ভিড ভেকচিন অপচয় হৈছে৷ মন কভিলগীয়া যে মহাৰাষ্ট্র, পঞ্জাব আৰু দিল্লী চৰকাৰে ভেকচিন প্রদানত কেন্দ্রীয় চৰকাৰে বৈষম্য কৰা বুলি অভিযোগ উত্থাপন কৰি আহিছে৷