নিয়মীয়া বাৰ্তা, ২২ জুনঃ কেন্দ্রীয় চৰকাৰৰ নতুন ভেকচিন নীতিৰ প্রথম দিনাই দেশজুৰি ৭৫ লক্ষাধিক ক’ভিড–১৯ ভেকচিনৰ ড’জ প্রদান কৰা হৈছে৷ কেন্দ্রীয় স্বাস্থ্য মন্ত্রালয়ে প্রকাশ কৰা মতে, এদিনত ৭৫ লক্ষাধিক ভেকচিন প্রদান কৰাটো এক অভিলেখ৷
এদিনত ভেকচিন প্রদানেৰে দেশে বিশ্বাভিলেখ গঢ়াৰ পাছত প্রধানমন্ত্রী নৰেন্দ্র মোদীয়ে আনন্দ প্রকাশ কৰি ভেকচিন মহামাৰী ক’ৰোনাৰ বিৰুদ্ধে শক্তিশালী অস্ত্র বুলি মন্তব্য কৰে৷ ইয়াৰ পূর্বে যোৱা ১ এপ্রিলত দেশত এদিনত ৪৮ লক্ষাধিক ভেকচিন ড’জ প্রদান কৰি অভিলেখ গঢ়িছে৷ বিশ্বৰ বৃহত্তম ক’ভিড–১৯ অভিযান চলি থকাৰ সময়তে ক’ভিড–১৯ৰ দ্বিতীয় জোৱাৰে দেশজুৰি সংহাৰী ৰূপ ধাৰণ কৰে৷ লাহে লাহে ক’ভিড–১৯ৰ দ্বিতীয় জোৱাৰৰ তীব্রতা হ্রাস পাই আছে৷
এদিনত চাৰি লক্ষাধিক লোক আক্রান্ত হৈ বিশ্ব অভিলেখ গঢ়াৰ পাছত যোৱা ২৪ ঘণ্টাত আক্রান্ত হৈছে ৫৩,২৫৬জন৷ এই আক্রান্তৰ সংখ্যা হৈছে ৮৮ দিনৰ ভিতৰত এদিনত সর্বনিম্ন৷ আনপিনে, বিগত ৩৭ দিন ধৰি আক্রান্ততকৈ সুস্থ হোৱা লোকৰ সংখ্যা অধিক হৈ আছে৷ যোৱা ২৪ ঘণ্টাত ৫৩ সহস্রাধিক লোক আক্রান্ত হোৱাৰ বিপৰীতে ৭৮ সহস্রাধিক লোক সুস্থ হৈ উঠিছে৷
স্বাস্থ্য মন্ত্রালয়ৰ তথ্য মতে দেশজুৰি আক্রান্তৰ সংখ্যা ২.৯৯ কোটিৰ অধিক হোৱাৰ বিপৰীতে সুস্থ হোৱা লোকৰ সংখ্যা ২.৮৮ কোটিৰ অধিক৷ সম্প্রতি দেশত সক্রিয় ক’ভিড ৰোগীৰ সংখ্যা ৭,০২,৮৮৭৷ আনপিনে, মৃতকৰ সংখ্যাও ধীৰে ধীৰে হ্রাস পাই আহিছে৷ যোৱা ২৪ ঘণ্টাত ১,৪২২জন লোকৰ মৃত্যু ঘটিছে৷ ইয়াকে লৈ মৃত্যু হোৱা লোকৰ সংখ্যা ৩,৮৮,১৩৫জনলৈ বৃদ্ধি পাইছে৷ মন কৰিবলগীয়া যে দেশৰ ৰাজধানী দিল্লীত ক’ভিড–১৯ৰ আক্রান্তৰ সংখ্যা চলিত বর্ষৰ এদিনত সর্বনিম্ন ৮৯জন লোক আক্রান্ত হৈছে৷ যোৱা ২৪ ঘণ্টাত ৮৯জন লোক আক্রান্ত হোৱাৰ বিপৰীতে মৃত্যু ঘটিছে ১১জনৰ৷
ৰাজধানী দিল্লীত এতিয়ালৈকে আক্রান্ত হৈছে ১৪.৩২ লাখ আৰু মৃত্যু ঘটিছে ২৪,৯২৫জনৰ৷ ক’ভিড–১৯ৰ দ্বিতীয় জোৱাৰত আক্রান্তৰ হাৰ দিল্লীত ৩৫ শতাংশলৈ বৃদ্ধি পোৱাৰ পাছত লকডাউনৰ ফলত এতিয়া আক্রান্তৰ হাৰ ০.১৬ শতাংশলৈ নিম্নগামী হৈছে৷ দিল্লীত চিকিৎসাধীন হৈ আছে ১,৯৯৬জন লোক৷ ইয়াৰ ভিতৰত ৫৬৩জন লোক হোম আইছ’লেচনত আছে৷