নিয়মীয়া বাৰ্তা ২৭ জুলাইঃ ক’ভিড মহামাৰীত স্বামীহাৰা হোৱা ৭৯১গৰাকী মহিলাক চিনাক্ত কৰি দিল্লী মহিলা আয়োগ (ডি চি ডব্লিউ)–এ কেজৰিৱাল চৰকাৰক এই মহিলাসকলৰ পুনৰ সংস্থাপন নিশ্চিত কৰিবলৈ এক প্রতিবেদন দাখিল কৰিছে৷ আয়োগে এক সামাজিক সমীক্ষাও চলাইছে৷ এই সমীক্ষাৰ জৰিয়তে দিল্লী চৰকাৰক মহিলাসকলৰ পুনৰ সংস্থাপন প্রক্রিয়াত সহায় কৰিবলৈ সংকল্প লোৱা হৈছে৷ স্মর্তব্য যে মহিলা পঞ্চায়ত নেটৱর্কৰ জৰিয়তে ডি চি ডব্লিউৱে তৃণমূল পর্যায়ত সামাজিক জৰীপ চলাইছিল৷
স্মর্তব্য যে দিল্লীৰ অৰবিন্দ কেজৰিৱাল চৰকাৰে ইতিমধ্যে মুখ্যমন্ত্রী ক’ভিড–১৯ পৰিবাৰ আর্থিক সহায়তা যোজনা মুকলি কৰিছে৷ এই যোজনাৰ জৰিয়তে ক’ভিডত কোনো পৰিয়ালৰ এজন লোকৰ মৃত্যু হ’লেই সেই পৰিয়ালটোক এককালীন সাহায্য হিচাপে ৫০ হাজাৰ টকা আগবঢ়োৱা হ’ব৷ লক্ষণীয়ভাৱে পৰিয়ালটোৰ প্রাণ হেৰুওৱা ব্যক্তিগৰাকী যদি উপার্জনকাৰী হয়, তেন্তে সেই পৰিয়ালটোক মাহিলি ২৫০০ টকাকৈ পেন্সন দিয়াৰ সিদ্ধান্তও লৈছে দিল্লী চৰকাৰে৷ দিল্লী চৰকাৰৰ এনে সিদ্ধান্তক আদৰণি জনাইছে মহিলা আয়োগৰ মুৰব্বী স্বাতী মালিৱালে৷