বায়ু প্রদূষণত ৫.২ বছৰ আয়ুস টুটিব দেশবাসীৰ

নিয়মীয়া বাৰ্তা ৩০ জুলাইঃ   বায়ু প্রদূষণৰ ফলত ভাৰতীয় লোকৰ আয়ুস ৫.২ বছৰ টুটিব৷ ইয়াৰ বিপৰীতে দেশৰ ৰাজধানী দিল্লীৰ নাগৰিকৰ আয়ুস টুটিব ৯.৪ বছৰ৷ বিশ্ব স্বাস্থ্য সংস্থাৰ নতুন প্রতিবেদনত এই উদ্বেগজনক তথ্য প্রকাশ পাইছে৷ প্রতিবেদন মতে, দেশখনত ২০১৮ চনত গড় পিএম২.৫ প্রতি ঘনমিটাৰত ৬৩ মাইক্রন আছিল৷ যিটো অতি বিপজ্জনক৷ কিয়নো বিশ্ব স্বাস্থ্য সংস্থাৰ নির্দেশনা অনুসৰি, প্রতি ঘনমিটাৰত পিএম২.৫ ১০ মাইক্রনতকৈ বেছি হ’ব নালাগে৷ ঠিক তেনেদৰে পিএম১০ প্রতি ঘনমিটাৰত ২০ মাইক্রনতকৈ অধিক হ’ব নালাগে৷ এনে হ’লে মানৱ স্বাস্থ্যৰ প্রতি বিপজ্জনক হৈ পৰে৷ বিশ্ব স্বাস্থ্য সংস্থাৰ নির্দেশনা যদি ভাৰতত সঠিকভাৱে পালন কৰিব পৰা যায়, তেতিয়াহ’লে দেশবাসীৰ গড় আয়ুস ৫.২ বছৰ বৃদ্ধি পাব৷ চিকাগো বিশ্ববিদ্যালয়ৰ শক্তি নীতি প্রতিষ্ঠানৰ দ্বাৰা অধ্যয়নৰ প্রতিবেদনত বায়ুমান জীৱন সূচাংক (একিউএলআই) ভাৰতত বৃদ্ধি পাব যদিহে প্রদূষণ হ্রাস কৰিব পৰা যায়৷ অন্যথা দেশখনৰ মানৱীয় স্বাস্থ্য অধিক সমস্যাৰ সন্মুখীন হ’ব৷ প্রতিবেদনত প্রকাশ পোৱা মতে, ১৯৯৮ চনৰ পৰা দেশত বার্ষিক বায়ু প্রদূষণ ৪২ শতাংশকৈ বৃদ্ধি হৈ আছে, যিয়ে দেশখনৰ লোকৰ গড় আয়ুস প্রতিবছৰে ১.৮ শতাংশকৈ হ্রাস কৰি আহিছে৷ দেশৰ উত্তৰ প্রান্তৰ ২৪৮ নিযুত লোকৰ গড় আয়ুস ৮ বছৰ হ্রাস পাব যদিহে বায়ু প্রদূষণৰ মাত্রা এনেদৰে চলি থাকে৷ লক্ষ্ণৌ চহৰত বিশ্ব স্বাস্থ্য সংস্থাৰ নির্দেশনাতকৈ ১১ গুণ অধিক বায়ু প্রদূষণ৷ গতিকে এই চহৰখনৰ লোকৰ আয়ুস ১০.৩ বছৰ হ্রাস পাব৷ লক্ষণীয় যে দেশৰ ৰাজধানী নতুন দিল্লীৰ বায়ু প্রদূষণ অতি ভয়াৱহ৷ যদিও মাজে মাজে বায়ুমান সূচাংক হ্রাস পাই থকাৰ পৰিপ্রেক্ষিতত ৰাজধানী চহৰখনৰ নাগৰিকৰ আয়ুস ৯.৪ বছৰ হ্রাস পাব৷ অৱশ্যে বায়ু প্রদূষণ নিয়ন্ত্রণ কৰি ৰাখিব পাৰিলে এই আয়ুস ৬.৫ বছৰলৈ হ্রাস পাব৷ উল্লেখ্য যে প্রতিবেদন মতে, ১৩০ কোটি লোকৰ ৮৪ শতাংশই বিশ্ব স্বাস্থ্য সংস্থাৰ নির্ধাৰিত বায়ুমানতকৈ অধিক স্থিতিত বাস কৰি আছে৷