নিয়মীয়া বাৰ্তা ১০ ডিচেম্বৰঃ উত্তৰ–পূর্বাঞ্চলৰ ৰাজ্য অসম আৰু অৰুণাচল প্রদেশৰ ২,৩৭৪খন গাঁৱত ম’বাইল নেটৱর্ক স্থাপনৰ বাবে ইউ এছ অ’ এফ আঁচনিৰ অধীনত ২০২৯ কোটি টকাৰ অনুমোদন দিছে কেন্দ্রীয় কেবিনেটে৷ আজি কেন্দ্রীয় কেবিনেটে ম’বাইল নেটৱর্কে সাঙুৰি নোলোৱা অসমৰ কার্বি আংলং আৰু ডিমা হাছাও জিলাৰ ৬৯১ গাঁও, অৰুণাচল প্রদেশৰ ১,৬৮৩ গাঁৱত ম’বাইল নেটৱর্ক প্রকল্পৰ বাবে ২,০২৯ কোটি টকা অনুমোদন জনায়৷ ইউ এছ অ’ এফ (ইউনিভার্ছেল ছার্ভিচ অব্লিগেচন ফাণ্ড) আঁচনিৰ অধীনত নির্মাণ কৰিবলগীয়া এই প্রকল্পটো ২০২২ চনৰ ডিচেম্বৰত সম্পূর্ণ কৰাৰ লক্ষ্য নির্ধাৰণ কৰা হৈছে৷ মুকলি নিবিদা প্রক্রিয়াৰ জৰিয়তে অসম আৰু অৰুণাচল প্রদেশৰ এই গাঁওকেইখনত ৪জি ম’বাইল সেৱা নেটৱর্কেৰে সংযোগ স্থাপন কৰা হ’ব৷
উল্লেখ্য যে অৰুণাচল প্রদেশৰ দুর্গম অঞ্চলৰ উল্লিখিত গাঁওকেইখনৰ লগতে অসমৰ কার্বি আংলং আৰু ডিমা হাছাও জিলাৰ ৬ শতাধিক গাঁৱত ম’বাইল নেটৱর্কৰ ব্যৱস্থা নাই৷ ডিজিটেল সংযোগেৰে অঞ্চলটোক সকলো দিশতে সমৃদ্ধিশালী কৰিবলৈ কেন্দ্রীয় চৰকাৰে কম্প্রিহেনচিভ টেলিকম ডেভেলপমেণ্ট প্লেন (চি টি ডি পি) আৰু নর্থ–ইষ্টার্ন ৰিজনৰ (এন ই আৰ) অধীনত ইউ এছ অ’ এফ আঁচনিৰ জৰিয়তে এই ম’বাইল নেটৱর্ক প্রকল্প স্থাপন কৰা হ’ব৷ ইপিনে আজি ১৪খন ৰাজ্যলৈ ৰাজহ ঘাটি অনুমোদনৰ ৬,১৯৫ কোটি টকা মুকলি কৰি দিছে কেন্দ্রীয় বিত্ত মন্ত্রালয়ে৷ কেন্দ্রীয় বিত্তমন্ত্রী নির্মলা সীতাৰমণে ৰাজহ পঞ্চদশ বিত্ত আয়োগৰ অন্তর্ৱর্তীকালীন অনুমোদনৰ আধাৰত কেন্দ্রীয় চৰকাৰে ১৪খন ৰাজ্যলৈ উক্ত ধনখিনি মুকলি কৰি দিয়া বুলি ঘোষণা কৰিছে৷ এই ১৪ ৰাজ্যৰ ভিতৰত অসমলৈ ৬৩,১৫৮.৩৩ লাখ মুকলি কৰি দিছে কেন্দ্রই৷ বাকী ৰাজ্যকেইখন হৈছে– নাগালেণ্ড, মণিপুৰ, মেঘালয়, মিজোৰাম, ত্রিপুৰা, ছিকিম, অন্ধ্রপ্রদেশ, হিমাচল প্রদেশ, কেৰালা, পঞ্জাব, তামিলনাডু, উত্তৰাখণ্ড আৰু পশ্চিমবংগ৷