নিয়মীয়া বাৰ্তা, ১৬ ফেব্ৰুৱাৰীঃ আজি ৰাতিপুৱা প্ৰায় ৭.৩০ বজাত মধ্য প্ৰদেশৰ চিধি জিলাৰ পাটনা গাঁওৰ ওচৰত সংঘটিত হয় এক শোকাৱহ দুৰ্ঘটনা।
এখন দলঙৰ পৰা বাছ বাগৰি পানীত পৰাৰ ফলত হোৱা এই দুৰ্ঘটনাত বহুতো যাত্ৰী ডুব যোৱাৰ আশংকা কৰা হৈছে।
জিলা আৰক্ষী অধীক্ষক পংকজ কুমাৱতৰ পৰা জানিব পৰা মতে, দলঙত খুন্দিয়াই বাছখন পানীত পৰি যায় আৰু বহুসংখ্যক লোক নিৰুদ্দেশ হৈ আছে। ইতিমধ্যে ৩৭গৰাকী লোকৰ মৃত্যু হৈছে।
ঘটনাটোৰ সময়ত বাছত কমেও ৫০ জন যাত্ৰী আছিল বুলি জানিব পৰা গৈছে। আনহাতে, সাঁতুৰি কমেও সাতজন ব্যক্তিয়ে প্ৰাণ ৰক্ষা কৰে যদিও পানীৰ প্ৰবাহ আৰু বাছখন সম্পূৰ্ণ ডুব যোৱাৰ ফলত বহু যাত্ৰী ওলোৱাৰ সুযোগেই নাপালে।