সীমান্তৰ ভূগর্ভত চীনে গোপনে মজুত কৰিছে পেট্র’ল–ইন্ধন

নিয়মীয়া বাৰ্তা ১৯ ডিচেম্বৰঃ চুবুৰীয়া ৰাষ্ট্র চীনে মৌখিকভাৱে প্রতিশ্রুতি দিলেও দুই দেশৰ সীমান্তৰ সমীপত গোপনে আন্তঃগাঁথনি নির্মাণ কৰি থকাক লৈ উদ্বিগ্ণ নতুন দিল্লী৷ লাডাখৰ এল এ চিৰ পৰা হিমালয় পাদদেশৰ উত্তৰ–পূর্বাঞ্চলৰ অৰুণাচল প্রদেশৰ আন্তর্জাতিক সীমান্তৰ সমীপত আন্তঃগাঁথনি নির্মাণ কৰি থকা ৰঙা চীনে এইবাৰ কাৰাকৰম গিৰিপথৰ পৰা আকচাই চীনলৈ নতুন পথ নির্মাণৰ তথ্য পোহৰলৈ আহিছে৷ এল এ চিৰ পৰা কেইবাকিলোমিটাৰ নিলগত চীনে আন্তঃগাঁথনি নির্মাণ কৰি থকাৰ তথ্য কৃত্রিম উপগ্রহৰ আলোকচিত্রত ধৰা পৰিছে৷ এল এ চিৰ পৰা কেইকিলোমিটাৰমান নিলগত গ’ল মোডত ৰঙা চীনে আন্তঃগাঁথনি আৰু নতুন লজিষ্টিক ডিপো নির্মাণ কৰিছে৷ তথ্য মতে, কাৰাকৰম গিৰিপথৰ পৰা আকচাই চীনলৈ যাত্রাৰ সময় হ্রাস কৰাৰ বাবে নতুন পথ নির্মাণ কৰাই নহয়, অঞ্চলসমূহত চীনে সামৰিক শক্তি বৃদ্ধিৰ লক্ষ্যৰে সা–সুবিধাৰ বাবে আন্তঃগাঁথনি নির্মাণ কৰিছে৷ কৃত্রিম উপগ্রহৰ আলোকচিত্রত ধৰা পৰা মতে, চীনে ভূ–গর্ভত পেট্র’লিয়াম সামগ্রী আৰু তেল জমা কৰিব পৰা সুবিধা নির্মাণ কৰিছে৷ চীনৰ সেনাৰ বাবে অতিকে গুৰুত্বপূর্ণ পথ হিচাপে চিহ্ণিত কাৰাকৰম গিৰিপথৰ পৰা আকচাই চীনলৈ নতুনকৈ পথ নির্মাণ কৰাৰ লগতে এই পথৰ সমীপত সামৰিক সক্ষমতা আৰু সুবিধা বৃদ্ধি কৰিছে৷ এই সামৰিক শক্তি–সক্ষমতাৰ যোগেদি দেশখনে ভাৰতক প্রত্যাহ্বান জনাব৷ উল্লেখ্য যে চীনে কাৰাকৰম গিৰিপথত ৮–১০ মিটাৰ বহল বিকল্প পথ নির্মাণ কৰাক লৈ নতুন দিল্লী গভীৰ উদ্বিগ্ণ হৈছে৷ কিয়নো এই পথটোৰ যোগেদি ভাৰতৰ ভূমিখণ্ডৰ দৌলত বেগ অ’ল্ডি ছেক্টৰলৈ যাত্রাৰ সময় প্রায় ২ ঘণ্টা হ্রাস হ’ব৷ ই চীনৰ বাবে অত্যন্ত লাভজনক হ’ব যদিও ভাৰতৰ বাবে এক প্রত্যাহ্বান হ’ব৷ ভাৰতীয় সেনাৰ এগৰাকী শীর্ষ বিষয়াই প্রকাশ কৰা মতে, কাৰাকৰম গিৰিপথৰ পৰা আকচাই চীন অঞ্চললৈ ইতিমধ্যে পথটো নির্মাণ হৈছে৷ অৱশ্যে ই এতিয়াও কেঁচা হৈয়ে আছে৷ এই অঞ্চলৰে ডাঙৰ ট্রাকেৰে গধুৰ সা–সামগ্রী কঢ়িয়াব পাৰি৷ তাৎপর্যপূর্ণ যে আকচাই চীন অঞ্চলটো ভাৰত আৰু চীনৰ বিবদমান অঞ্চল হিচাপে চর্চিত৷ ইয়াৰ পৰিপ্রেক্ষিতত বেইজিঙে আগ্রাসী মনোভাবেৰে উক্ত অঞ্চললৈ সংযোগী নতুন পথ নির্মাণ কৰাটোৱে দেশখনে গোপনে ভাৰতবিৰোধী কার্যকলাপ আগবঢ়াই নিয়াটো প্রমাণিত কৰিছে৷