নিয়মীয়া বাৰ্তা ২৮ জুনঃ বাংলাদেশৰ ৰাজধানী ঢাকাত ক’ভিড–১৯ ভাইৰাছত ডেল্টা ভেৰিয়েণ্টৰ সংক্রমণৰ উপস্থিতি ধৰা পৰাৰ পিছতে চৰকাৰে কাইলৈৰ পৰা ৭দিনীয়া কঠোৰ লকডাউন জাৰি কৰাৰ সিদ্ধান্ত লৈছে৷ এই লকডাউনৰ সময়ত সকলো লোককে ঘৰৰ ভিতৰত থাকিবলৈ নির্দেশ দিছে চৰকাৰে৷ চৰকাৰৰ এই কঠোৰ নির্দেশনা লাভ কৰাৰ পিছতে ঢাকাৰ পৰা হাজাৰ হাজাৰ লোকে পলায়ন কৰিছে৷
উল্লেখনীয় যে ঢাকাত ক’ভিড লকডাউনৰ সময়ত বাসিন্দাসকলে ঘৰৰ বাহিৰলৈ ওলাই আহিলে জৰুৰী অৱস্থা জাৰি কৰিব বুলি চৰকাৰে হুংকাৰ দিছে৷ ইয়াৰ ফলতেই ৰাজধানী চহৰখনৰ পৰা সৰু সৰু চহৰ তথা গাঁওবোৰলৈ পলায়ন কৰিছে বহু লোকে৷ ঢাকাত অস্থায়ীভাৱে বাস কৰি থকা লোকসকলে লকডাউন প্রয়োগ হোৱাৰ পূর্বেই নিজ ঘৰলৈ পলায়ন কৰাৰ দৃশ্য ছ’চিয়েল মিডিয়াত মুকলি হোৱাৰ লগে লগে বিষয়টোক লৈ সৃষ্টি হৈছে চাঞ্চল্য৷ উল্লেখনীয় যে যোৱা ১৫ মে’ত বাংলাদেশত ক’ভিড মহামাৰীত আক্রান্ত লোকৰ সংখ্যা আছিল ২৬১জন৷ কিন্তু যোৱা শুকুৰবাৰলৈ আক্রান্ত লোকৰ সংখ্যা ৫,৮৬৯জনলৈ বৃদ্ধি পাইছে৷