নিয়মীয়া বাৰ্তা, ১২ ছেপ্টেম্বৰঃ তৃণমূল কংগ্রেছৰ সাংসদ তথা পশ্চিমবংগৰ মুখ্যমন্ত্রী মমতা বেনার্জীৰ ভতিজা অভিষেক বেনার্জীক পুনৰ চমন জাৰি কৰিছে এনফ’চমেণ্ট ডাইৰেক্টৰেট (ইডি)–এ৷ কয়লা কেলেংকাৰি গোচৰত ইডিয়ে শনিবাৰে জাৰি কৰা চমনক লৈ তৃতীয়বাৰ সাংসদ বেনার্জীক চমন জাৰি কৰা হৈছে৷
উল্লেখ্য যে কয়লা কেলেংকাৰিৰ গোচৰত অবৈধ ধনৰ লেনদেনক লৈ যোৱা সোমবাৰে ইডিয়ে সাংসদ অভিষেক বেনার্জীক জেৰা কৰাৰ অন্তত পুনৰ বুধবাৰে ইডিৰ কার্যালয়ত হাজিৰ হ’বলৈ সাংসদগৰাকীক চমন জাৰি কৰিছে৷ কিন্তু ইডিয়ে জাৰি কৰা চমনক গুৰুত্ব নিদি সাংসদগৰাকীয়ে ইডিৰ সন্মুখত হাজিৰ হোৱা নাছিল৷ ইয়াৰ পিছতেই অহা ২১ ছেপ্ঢেম্বৰত নতুন দিল্লীৰ ইডিৰ কার্যালয়ত সাংসদ বেনার্জীক উপস্থিত হ’বলৈ চমন জাৰি কৰিছে৷ চমনত সাংসদ বেনার্জীৰ লগতে পত্নীকো হাজিৰ হ’বলৈ নির্দেশ দিয়া হৈছে৷
মন কৰিবলগীয়া যে সোমবাৰে নতুন দিল্লীৰ ইডিৰ কার্যালয়ত সাংসদ বেনার্জীক ৮ ঘণ্টাতকৈ অধিক সময় ধৰি জেৰা কৰা হৈছিল৷ ইডিয়ে জেৰা কৰা এই কেলেংকাৰি গোচৰত দুটা কোম্পানী জড়িত হৈ আছে আৰু কোম্পানী দুটাৰ পৰা সাংসদ অভিষেক বেনার্জী আৰু তেওঁৰ পৰিয়ালে ৪.৩৭ কোটি টকা লোৱাৰ অভিযোগ উত্থাপন হৈছে৷ সাংসদ বেনার্জীয়ে কয়লা কেলেংকাৰিত জড়িত লিপছ আৰু বাউণ্ড প্রাইভেট লিমিটেড, লিপছ আৰু বাউণ্ড মেনেজমেণ্ট ছার্ভিচেজ এলএলপি নামৰ কোম্পানী দুটাৰ পৰা বৃহৎ ধন লৈ কোম্পানী দুটাক সুৰক্ষা দিছিল৷