নিয়মীয়া বাৰ্তা ১৭ ফেব্ৰুৱাৰীঃ ম্যানমাৰত সামৰিক অভ্যুত্থানবিৰোধী প্রতিবাদকাৰীৰ বিৰুদ্ধে হিংস্র অৱদমন চলিলে দেশখনৰ সেনাশাসক ভয়াৱহ পৰিণতিৰ সন্মুখীন হ’ব লাগিব৷ শেহতীয়াকৈ এই সকীয়নি প্রদান কৰিছে বিশ্বৰ সর্বোচ্চ সংস্থা ৰাষ্ট্রসংঘই৷ ৰাষ্ট্রসংঘৰ বিশেষ কূটনীতিক ক্রিষ্টাইন স্কানাৰ বার্গেনাৰে আজি ম্যানমাৰৰ সামৰিক চৰকাৰলৈ সতর্কবাণী কৰি কৈছে যে দেশখনত শান্তিপূর্ণভাৱে জনসাধাৰণৰ প্রতিবাদ সাব্যস্ত কৰাৰ যি অধিকাৰ, তাক সন্মান জনোৱা উচিত৷ অন্যথা আন্তর্জাতিক সম্প্রদায়ে ম্যানমাৰৰ সেনা চৰকাৰৰ বিৰুদ্ধে কঠোৰ পদক্ষেপ গ্রহণ কৰিবলৈ বাধ্য হ’ব বুলিও বার্গেনাৰে উল্লেখ কৰিছে৷ স্মর্তব্য যে আজি পুৱা দেশখনত ইণ্টাৰনেট সেৱা পুনৰ মুকলিৰ অনুমতি দিছে সামৰিক চৰকাৰে৷