নিয়মীয়া বাৰ্তা ১৬ জুনঃ গালৱান উপত্যকাত চীনা বাহিনীৰে সংঘর্ষত প্রাণ হেৰুওৱা শ্বহীদ জোৱানসকলক আজি প্রথমটো বার্ষিকীত শ্রদ্ধাঞ্জলি জ্ঞাপন কৰিছে ভাৰতীয় সেনাই৷ ভাৰতীয় সেনাৰ লেহস্থিত ১৪ ক’পছৰ তৰফৰ পৰা গালৱানৰ সংঘর্ষৰ বর্ষপূর্তিত মঙলবাৰে বীৰ শ্বহীদসকললৈ শ্রদ্ধাঞ্জলি জ্ঞাপন কৰা হয়৷ স্মর্তব্য যে চীনা বাহিনীৰ অভাৱনীয় আগ্রাসনৰ সময়ত ২০ ভাৰতীয় জোৱানে প্রাণ হেৰুৱাবলগীয়া হৈছিল গালৱান উপত্যকাত৷ এই জোৱানসকলে মাতৃভূমিক ৰক্ষা কৰিবলৈ প্রাণ আহুতি দিছিল বুলি সেনাই আজি এক বিবৃতিত উল্লেখ কৰে৷ লেহস্থিত ১৪ ক’পছক সাধাৰণতে ‘ফায়াৰ এণ্ড ফিউৰী’ ক’পছ বুলি জনা যায়৷ চীনৰ পি এল এৰ বিৰুদ্ধে এই জোৱানসকলে বীৰত্বৰ পৰিচয় দাঙি ধৰিছিল৷ আজিৰ এই শ্রদ্ধাঞ্জলি অনুষ্ঠানত অংশগ্রহণ কৰে মেজৰ জেনেৰেল আকাশ কৌশিকে৷