নিয়মীয়া বাৰ্তা ২০ জুলাইঃ আয়কৰ বিভাগৰ এপেলেট ট্রিবুনেল (আইটিএটি)ৰ মুম্বাই শাখাই চলোৱা এক তদন্তত ছুইছ বেংকত ধন ৰখা এগৰাকী মহিলাক জালত পেলাবলৈ সক্ষম হৈছে৷ ৮০ বছৰীয়া মহিলাগৰাকীৰ মাহিলি উপার্জন মাত্র ১৪ হাজাৰ টকা দেখুৱাইছিল যদিও ছুইছ বেংকৰ একাউণ্টত জমা হৈ আছে মহিলাগৰাকীৰ নামত ১৯৬ কোটি টকা৷ আয়কৰ বিভাগৰ মুম্বাই শাখাই ইতিমধ্যে এই তথ্য পোহৰলৈ অনাৰ লগতে কৰসহ জৰিমনা আদায় দিবলৈ মহিলাগৰাকীক নির্দেশ দিছে৷ উল্লেখনীয় যে ৰেণু থাৰানী নামৰ ৮০ বছৰীয়া মহিলাগৰাকী জেনেভাস্থিত এইচএছবিচিৰ একাউণ্টত এই ধন মজুত আছে৷ লগে লগে মহিলাগৰাকীয়ে কেনেদৰে ছুইছ বেংকত এই বৃহৎ পৰিমাণৰ ধনৰাশি জমা কৰিবলৈ সক্ষম হ’ল তাক লৈ বিভিন্ন মহলত সৃষ্টি হৈছে চাঞ্চল্য৷ ২০০৫–০৬ চনত আয়কৰ প্রদান কৰাৰ সময়ত ছুইছ বেংকত এই বৃহৎ ধনৰাশি জমা হৈ থকাৰ কথা প্রকাশ কৰা নাছিল মহিলাগৰাকীয়ে৷