নিয়মীয়া বাৰ্তা, ২২ অক্টোবৰঃ চীনৰ সৈতে সংলগ্ন সীমান্তত বিশেষকৈ এল এ চিত চুবুৰীয়া ৰাষ্ট্রখনৰ যিকোনো দুঃসাহসিক অভিযান ব্যর্থ কৰিবলৈ সীমান্তত সাজু হৈ আছে অত্যাধুনিক অস্ত্র–শস্ত্রৰে ভাৰতীয় সেনা৷ চীনৰ সৈতে এল এ চিত যুদ্ধংদেহি ভাৰতীয় সেনাৰ যুদ্ধৰ অনুশীলন আৰু প্রশিক্ষণৰ ভিডিঅ’ৰ প্রচাৰে এখন যুদ্ধৰ ইংগিত বহন কৰিছে৷
উত্তৰ–পূর্বাঞ্চলৰ অৰুণাচল প্রদেশৰ এল এ চিত ৰঙা চীনৰ সেনাৰ গতিবিধি সূক্ষ্ম নিৰীক্ষণ কৰি থকা ভাৰতীয় সেনাই শত্রুৰ টেংক ধ্বংস কৰাৰ যুদ্ধ অনুশীলন ভিডিঅ’যোগে প্রচাৰ হৈছে আৰু ই ছ’চিয়েল মিডিয়াত আলোড়ন তুলিছে৷ ভিডিঅ’টোত অৰুণাচলৰ ঘন কুঁৱলীৰ মাজত টাৱাং ছেক্টৰত ভাৰতীয় সেনাৰ এণ্টি টেংক স্কোৱাডে শত্রুৰ টেংক ধ্বংস কৰাৰ অনুশীলনৰ লগতে ভাৰতীয় সেনাৰ কঠোৰ প্রশিক্ষণ আৰু অনুশীলন দেখা গৈছে৷
চলিত মাহৰ আৰম্ভতে টাৱাং ছেক্টৰত চীনৰ পি এল এ অনুপ্রৱেশ কৰি ভাৰত ভূমিত প্রৱেশ কৰিবলৈ চেষ্টা কৰোঁতেই ভাৰতীয় সেনাই খেদি পঠিয়ায়৷ এই পৰিস্থিতিৰ পাছতেই এল এ চিত ভাৰতীয় সেনাই ইজৰাইলী হেৰন ড্র’নকে ধৰি অত্যাধুনিক হেলিকপ্টাৰ মোতায়েন কৰি পি এল এৰ গতিবিধি লক্ষ্য কৰি আছে৷
চীনা সেনাৰ গতিবিধি লক্ষ্য কৰি থকাৰ সময়তে ভাৰতীয় সেনাৰ শত্রুৰ টেংক ধ্বংস কৰা যুদ্ধৰ অনুশীলন, কঠোৰ প্রশিক্ষণৰ ভিডি’ প্রচাৰিত হোৱাত চীনৰ বিৰুদ্ধে ভাৰতৰ সমৰসজ্জা স্পষ্ট হৈছে৷ চীনৰ পৰা আহিব পৰা যিকোনো ভাবুকি মোকাবিলা কৰিবলৈ ভাৰতীয় সেনাই চলাই থকা প্রস্তুতি ভিডিঅ’যোগে প্রচাৰ কৰা হৈছে৷ ৫ মাউণ্টেন ডিভিজন জেনেৰেল অফিচাৰ কমাণ্ডিং মেজৰ জেনেৰেল জুবিন মিনৱালাই প্রকাশ কৰা মতে, প্রযুক্তি ব্যৱহাৰ কৰি আমি চীনৰ সেনাৰ গতিবিধি লক্ষ্য কৰি আহিছোঁ৷ স্থলভাগৰ লগতে আকাশমার্গতো চেঞ্চৰ ব্যৱহাৰ কৰা হৈছে৷ ৰাডাৰ নেটৱর্ক আৰু মানৱবিহীন পদ্ধতি ব্যৱহাৰেৰে শত্রু পক্ষৰ সেনাৰ গতিবিধি নিৰীক্ষণ কৰি থকা হৈছে৷
উল্লেখ্য যে অৰুণাচল প্রদেশৰ এল এ চিত পাহাৰৰ উচ্চতাত সেনাই উন্নীত এল ৭০ বিমান বিধ্বংসী বন্দুক মোতায়েন কৰিছে৷ ইয়াৰ উপৰি এম ৭৭৭ হাউটজাৰ আৰু ছুইডেনৰ বফ’ছ গান মোতায়েন কৰা হৈছে৷