মুম্বাই–পুনে, হটস্পটত ৩১ মে’লৈ বৃদ্ধি লকডাউন

নিয়মীয়া বাৰ্তা ১৬ মেঃ দেশৰ ভিতৰতে ক’ৰোনা ভাইৰাছত সর্বাধিক আক্রান্ত মহাৰাষ্ট্রৰ বিভিন্ন স্থানত লকডাউন ৩১ মে’লৈ বৃদ্ধি কৰা হৈছে৷ উদ্ধৱ থাকৰে নেতৃত্বাধীন মহাৰাষ্ট্র চৰকাৰে মুম্বাই মেট্র’পলিটান অঞ্চল, পুনে, মালেগাঁও, ঔৰংগাবাদ আৰু ছোলাপুৰৰ হটস্পটত অহা ৩১ মে’লৈ লকডাউন বৃদ্ধিৰ সিদ্ধান্ত লয়৷ কেন্দ্রীয় চৰকাৰৰ গাইডলাইন মতে ১৭ মে’ত তৃতীয় পর্যায়ৰ লকডাউনৰ অন্ত পৰিব৷ কিন্তু মুম্বাইৰ লগতে ক’ৰোনাত সর্বাধিক আক্রান্ত অঞ্চলসমূহত মহামাৰীৰ সংক্রমণ ৰোধ কৰাৰ বাবে লকডাউন বৃদ্ধি কৰাৰ সিদ্ধান্ত লোৱা বুলি জানিবলৈ দিছে মিউনিছিপাল কমিছনাৰ আই এছ ছাহালে৷ উল্লেখ্য যে বৃহস্পতিবাৰে মহাৰাষ্ট্রৰ মুখ্যমন্ত্রী উদ্ধৱ থাকৰেই ক’ৰোনা ভাইৰাছ হটস্পটসমূহত লকডাউন বৃদ্ধি কৰা হ’ব বুলি ঘোষণা কৰিছে৷ ইফালে লকডাউনৰ বাবে মহাৰাষ্ট্রত সুৰাৰ বিপণীসমূহ বন্ধ হৈ থকাৰ সময়তে পালঘৰ জিলাত এম্বুলেঞ্চৰ সহায়েৰে ৫ লাখ টকাৰ সুৰা গোপনে সৰবৰাহ কৰোঁতেই ধৰা পেলায় আৰক্ষীয়ে৷ ৰাজ্যখনত বিভিন্ন অঞ্চলত পাঁচখন বিভিন্ন বাহনত এনেদৰে গোপনে সুৰা সৰবৰাহ ধৰা পেলাই আৰক্ষীয়ে গাড়ীসমূহ জব্দ কৰাৰ লগতে ঘটনা সন্দর্ভত ১৫জনকৈ লোকক গ্রেপ্তাৰ কৰিছে৷ এই সন্দর্ভত ভিহাৰ, ভালিভ, মাণিকপুৰ আৰু তুলিঞ্জ আৰক্ষী থানাত গোচৰো ৰুজু কৰা হৈছে৷