নিয়মীয়া বাৰ্তা, ২২ জুনঃ বিজেপি সাংসদ তথা ভোজপুৰী অভিনেতা মনোজ তিৱাৰীয়ে আজি পাটনাস্থিত সুশান্ত সিং ৰাজপুতৰ ঘৰত উপস্থিত হয়। সাংসদগৰাকীয়ে সুশান্তৰ শোকসন্তপ্ত পৰিয়ালৰ লগত কিছু সময় কটাই তেওঁলোকৰ প্ৰতি সমব্যাথা ব্যক্ত কৰে।
পাটনাৰ স্থানীয় সাংবাদিকৰে হোৱা কথা-বাৰ্তাত সাংসদগৰাকীয়ে কয় যে সৰু চহৰৰ পৰা মুম্বাইৰ বলীউডলৈ যোৱা কোনো প্ৰতিভাই যদি নিজ পৰিশ্ৰমৰ বলত উচ্চস্থানলৈ গতি কৰে, তেন্তে তাক দমন কৰাৰ এটা প্ৰভাৱশালী চক্ৰ মুম্বাইৰ সেই জগতখনত মজুত আছে। এনেধৰণৰ ঘটনাৰেই সুশান্ত চিকাৰ হোৱা বুলি চৰ্চা চলি আছে।
সুশান্ত কি কাৰণত বিচলিত হৈছিল, সেইটো নিশ্চিতভাৱে জনা দৰকাৰ। গতিকে এই বিষয়তো তদন্ত কৰাৰ প্ৰয়োজন আছে। সাংসদগৰাকীয়ে সুশান্তৰ আত্মহত্যাৰ তদন্ত প্ৰক্ৰিয়া পৰিয়ালে বিচৰাৰ দৰে চি বি আইৰ দ্বাৰা কৰোৱাৰ ওপৰত গুৰুত্ব দিয়ে। উল্লেখ্য, সুশান্ত সিং ৰাজপুতৰ আত্মহত্যাই যথেষ্ট প্ৰভাৱিত কৰিছে বলীউডৰ লগতে যুৱপ্ৰজন্মক।