বিশেষ বাৰ্তা, ২৪ মেঃ অভিনয়ৰ বাবে কেৱল ভাৰততে নহয় বিদেশতো বিখ্যাত হৈ পৰিছে নৱাজউদ্দিন ছিদ্দিকী। ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত তেওঁ বহুবাৰ সন্মানিত হৈছে। এইবাৰ নৱাজউদ্দিন ছিদ্দিকীয়ে কাঁ চলচ্চিত্ৰ মহোৎসৱত অংশগ্ৰহণ কৰিছে। ফ্ৰান্স ৰিভিয়াৰাত নৱাজৰ উপস্থিতিয়ে কেৱল ভাৰতীয়কে নহয়, বিদেশী তাৰকাসকলকো আকৰ্ষিত কৰিছে। এই উপলক্ষে নৱাজক সম্বৰ্ধনা জনোৱা হৈছে। চিনেমাত কৰা অসাধাৰণ কামৰ বাবে নৱাজউদ্দিনক কাঁ ২০২২ত এৱাৰ্ড ফৰ এক্সেলেন্সেৰে সন্মানিত কৰা হৈছে। বলিষ্ঠ অভিনেতাজনক এই বঁটা প্ৰদান কৰিছে দুবাৰকৈ এমী বঁটা বিজয়ী আমেৰিকান অভিনেতা তথা প্ৰযোজক ভিনচেণ্ট ডি পলে। বলীউডৰ গ্লেমাৰহীন এইজন অভিনেতাই এনে বঁটা লাভ কৰাটো এয়াই প্ৰথম নহয়। ইয়াৰ পূৰ্বেও কাঁ চলচ্চিত্ৰ মহোৎসৱত ভাৰতৰ পৰা এই বঁটা গ্ৰহণৰ বাবে নৱাজক প্ৰতিনিধিসকলৰ মাজত অন্তৰ্ভুক্ত কৰা হৈছিল।