নিয়মীয়া বাৰ্তা ৩১ আগষ্টঃ আনলক ৪.০ নির্দেশনা ঘোষণাৰ দিনাই ক’ভিড–১৯ সংক্রমণৰ অনাকাংক্ষিত বিশ্ব অভিলেখ গঢ়িলে ভাৰতে৷ ২৪ ঘণ্টাত অর্থাৎ এদিনত সর্বাধিক ৭৮,৭৬১জন আক্রান্তৰে এদিনত সর্বাধিক আক্রান্ত আমেৰিকা যুক্তৰাষ্ট্রক চেৰ পেলাই ভাৰতে বিশ্ব অভিলেখ গঢ়িলে৷ বিগত ২৪ ঘণ্টাত দেশজুৰি ১০.৫৫ লাখৰ ক’ভিড–১৯ৰ নমুনা সংগ্রহ কৰে আৰু ইয়াৰে ৭৮,৭৬১জন পজিটিভ হয়৷ এদিনত সর্বাধিক আক্রান্তৰে দেশত মুঠ আক্রান্তৰ সংখ্যা ৩৫ লাখ অতিক্রম কৰে৷ ইপিনে, ২৪ ঘণ্টাত ৯৪৮জন লোকে প্রাণ হেৰুওৱাত মৃতকৰ সংখ্যা ৬৪ হাজাৰ অতিক্রম কৰে৷ বিশ্বৰ সর্বাধিক আক্রান্তৰ তালিকাত তৃতীয় স্থানত থকা দেশ ভাৰতে মৃতকৰ তালিকাতো তৃতীয় স্থানত আছে৷ আক্রান্ত আৰু মৃতকৰ তালিকাত ভাৰতৰ আগত আছে প্রথম স্থানত আমেৰিকা যুক্তৰাষ্ট্র আৰু দ্বিতীয় স্থানত ব্রাজিল৷ উল্লেখ্য যে ১৩০ কোটি জনসংখ্যাৰ দেশখনত এতিয়ালৈকে ৪ কোটিতকৈ অধিক লোকৰ ক’ভিড–১৯ পৰীক্ষণ কৰা হৈছে আৰু ইয়াৰে ভিতৰত ৩০.৫৫ লক্ষাধিক লোক আক্রান্ত হৈছে৷ আনপিনে মৃত্যু ঘটিছে ৬৪ সহস্রাধিকৰ৷ তাৎপর্যপূর্ণ যে দেশত ক’ভিড–১৯ৰ প্রাদুর্ভাৱ ঘটাৰ ১১০ দিনত আক্রান্তৰ সংখ্যাই ১ লাখ অতিক্রম কৰে৷ ১০ লাখ অতিক্রম কৰে মাত্র ৫৯ দিনত৷ তাতোকৈ গুৰুত্বপূর্ণ যে ১০ লাখ পৰা ২০ লাখ হ’বলৈ মাত্র ২১ দিন আৰু ২০ লাখৰ পৰা ৩০ লাখ মাত্র ১৬ দিনতেই হৈছে৷ যোৱা ৭ আগষ্টত ক’ভিড–১৯ আক্রান্তৰ সংখ্যা ২০ লাখ অতিক্রম কৰাৰ পিছত ২৩ আগষ্টত আক্রান্তৰ সংখ্যাই ৩০ লাখ অতিক্রম কৰে৷ ইপিনে, যোৱা ৭ আগষ্টত দেশত প্রথমবাৰৰ বাবে আক্রান্তৰ সংখ্যাই এদিনত ৬০ হাজাৰ অতিক্রম কৰাৰ পিছত ক্রমান্বয়ে এই আক্রান্তৰ সংখ্যা বৃদ্ধি পাবলৈ ধৰে৷ যোৱা বৃহস্পতিবাৰে প্রথমবাৰৰ বাবে আক্রান্তৰ সংখ্যা এদিনত ৭৫ হাজাৰ অতিক্রম কৰাৰ পিছত সেই ধাৰা অব্যাহত ৰাখি প্রতিদিনে আক্রান্তৰ সংখ্যা বৃদ্ধি পাই আছে৷ বিগত ২৪ ঘণ্টাত আক্রান্তৰ সংখ্যা এদিনত ৭৮,৭৬১জনলৈ বৃদ্ধি পোৱাত বিশ্বত এদিনৰ ভিতৰত সর্বাধিক আক্রান্তৰ অভিলেখৰ গৰাকী হয় দেশখন৷ কেন্দ্রীয় স্বাস্থ্য মন্ত্রালয়ৰ তথ্য মতে দেশত সুস্থৰ হাৰো ক্রমাৎ বৃদ্ধি পাই আছে৷ এতিয়ালৈকে ২৭ লক্ষাধিক লোক সুস্থ হৈছে৷ আক্রান্ত হৈ চিকিৎসালয়ত ভর্তি হৈ থকা সংখ্যাৰ তুলনাত সুস্থৰ হাৰ ৩.৫ গুণ অধিক৷ দেশৰ সর্বাধিক আক্রান্ত আৰু মৃতকৰ তালিকাত মহাৰাষ্ট্র আছে৷ ৰাজ্যখনৰ ৭ লক্ষাধিক লোক আক্রান্ত হোৱাৰ বিপৰীতে ২৪ সহস্রাধিক লোকৰ প্রাণহানি হৈছে৷ ইয়াৰ পিছতেই আক্রান্তৰ তালিকাত তামিলনাডু, অন্ধ্র প্রদেশ, কর্ণাটক, উত্তৰ প্রদেশ, পশ্চিমবংগ আদি ৰাজ্য আছে৷ প্রাণহানি হোৱা ৰাজ্যৰ ভিতৰত শীর্ষত মহাৰাষ্ট্র থকাৰ বিপৰীতে সাত সহস্রাধিকেৰে দ্বিতীয় স্থানত তামিলনাডু, ৫ সহস্রাধিকেৰে তৃতীয় স্থানত কর্ণাটক, চাৰি সহস্রাধিকেৰে চতুর্থ স্থানত দিল্লী, ৩.৫ সহস্রাধিকেৰে পঞ্চম স্থানত অন্ধ্রপ্রদেশ, তিনি সহস্রাধিকেৰে ষষ্ঠ আৰু সপ্তম স্থানত ক্রমে উত্তৰ প্রদেশ, পশ্চিমবংগ, প্রায় ৩ হাজাৰেৰে অষ্টম স্থানত গুজৰাট আৰু এক সহস্রাধিকেৰে নৱম আৰু দশম স্থানত ক্রমে পঞ্জাব আৰু মধ্য প্রদেশ আদি৷