নিয়মীয়া বাৰ্তা, ৮ ডিচেম্বৰঃ শুভ বিবাহৰ দিনাই ক’ভিড–১৯ত আক্রান্ত হ’ল কইনা৷ ধর্মীয় নীতি–নিয়ম অনুযায়ী বিবাহৰ শুভ দিন ধার্য কৰাৰ পৰিপ্রেক্ষিততে ক’ভিড–১৯ত আক্রান্ত কইনাৰ সৈতে বিবাহত বহিল দৰা৷
ক’ভিড–১৯ৰ সংক্রমণৰ প্রতি লক্ষ্য ৰাখি দৰা–কইনাই বিবাহৰ সময়ত পিন্ধি লৈছিল পি পি ই কিট৷ ৰাজস্থানৰ বাৰাৰ কেলৱাৰা ক’ভিড চেণ্টাৰত এই শুভ বিবাহ সম্পন্ন হৈছে৷ পুৰোহিতৰ উপৰি মাত্র এজন লোকৰ উপস্থিতিত পি পি ই কিট পৰিধান কৰা দৰা–কইনাৰ সকলো মাংগলিক অনুষ্ঠান সম্পন্ন কৰা হয়৷ দৰা–কইনাৰ মাল্যার্পণ কৰাৰ উপৰি হোমৰ গুৰিত মাংগলিক কার্য কৰি থকাৰ সময়ত ক’ভিড–১৯ নির্দেশনা অনুসৰি তেওঁলোকে পৰিধান কৰি আছিল পি পি ই কিট৷
ছ’চিয়েল মিডিয়াত এই বিবাহৰ ফুটেজ প্রচাৰ হোৱাৰ লগে লগে আলোড়নৰ সৃষ্টি হৈছে৷ তাৎপর্যপূর্ণ যে বিবাহৰ সময়ত পুৰোহিতেও পি পি ই কিট পিন্ধি মাংগলিক কার্য সমাপন কৰিছে৷