নিয়মীয়া বাৰ্তা, ২৮ অক্টোবৰঃ বিহাৰ বিধানসভা নির্বাচনৰ প্রথম পর্যায়ৰ ভোটগ্রহণৰ পূর্বে মহাজোঁটৰ মুখ্যমন্ত্রী পদৰ প্রার্থী তেজস্বী যাদৱে উল্লেখ কৰিছে যে বিধানসভা নির্বাচনৰ ইছ্যুভিত্তিক প্রচাৰ চলাইছে আৰ জে ডিয়ে৷
এই ইছ্যুভিত্তিক প্রচাৰত ৰাজ্যখনৰ জনসাধাৰণে সমর্থন জনোৱা বুলিও উল্লেখ কৰিছে নেতাগৰাকীয়ে৷ আগন্তুক ১০ নৱেম্বৰত নির্বাচনী ফলাফল ঘোষণা হোৱাৰ দিনাই বিহাৰত নতুন সূর্যোদয়ৰ পুৱা দেখিবলৈ পোৱা যাব বুলিও উল্লেখ কৰিছে তেজস্বীয়ে৷
তেজস্বী যাদৱৰ মতে আগন্তুক নির্বাচনত মহাজোঁটে দুই–তৃতীয়াংশ সংখ্যাগৰিষ্ঠতাৰে ৰাজ্যত চৰকাৰ গঠন কৰাৰ সুযোগ লাভ কৰিব৷ চৰকাৰ গঠন কৰিয়েই প্রথম বিধানসভা অধিৱেশনত কেন্দ্রীয় চৰকাৰে প্রণয়ন কৰা কৃষকবিৰোধী তিনিখন আইন বর্জন কৰাৰ বাবে এক বিধেয়ক উত্থাপন কৰিব বুলিও নির্বাচনত প্রথম পর্যায়ৰ ভোটগ্রহণৰ পূর্বে মন্তব্য কৰিছে নেতাগৰাকীয়ে৷
ইফালে, নীতিশ কুমাৰৰ বিৰুদ্ধে নির্বাচনৰ আগদিনাখনো ক্ষুৰধাৰ মন্তব্য আগবঢ়ায় আৰ জে ডিৰ নেতাগৰাকীয়ে৷