নিয়মীয়া বাৰ্তা ২৯ মেঃ বলীউডৰ অভিনেতা সুশান্ত সিং ৰাজপুতৰ মৃত্যুৰ সৈতে সম্পর্কিত ড্রাগ্ছৰ এটা গোচৰত আজি নার্ক’টিক কণ্ড্র’ল ব্যুৰ’ (এন চি বি)এ গ্রেপ্তাৰ কৰিছে সিদ্ধার্থ পিথানী নামৰ লোক এজনক৷ সিদ্ধার্থ পিথানী আছিল সুশান্ত সিং ৰাজপুতৰ এগৰাকী বন্ধু৷ হায়দৰাবাদৰ পৰা এন চি বিয়ে পিথানীক গ্রেপ্তাৰ কৰাৰ লগে লগে সুশান্ত সিং ৰাজপুতৰ মৃত্যুৰ গোচৰটোৱে অন্য মোৰ লোৱাৰ সম্ভাৱনা প্রকট হৈছে৷ উল্লেখনীয় যে ২০২০ চনৰ ১৪ জুনত মুম্বাইৰ যিটো ফ্লেটত সুশান্ত সিং ৰাজপুতে আত্মহত্যা কৰিছিল, তেতিয়া সিদ্ধার্থ পিথানীও অন্য তিনিগৰাকী লোকৰ সৈতে ফ্লেটটোত উপস্থিত আছিল৷ মুম্বাই আৰক্ষী আৰু চি বি আয়ে ইয়াৰ পূর্বেও পিথানীক কেইবাবাৰো জেৰা কৰিছে৷ স্মর্তব্য যে পিথানীয়ে পূর্বৰে পৰা নিজকে ছবি নির্মাতা তথা অভিনেতা হিচাপে পৰিচয় দি আহিছে৷