নিয়মীয়া বাৰ্তা ২০ জুনঃ নতুন দিল্লীৰ নিজামুদ্দিন মার্কাজৰ তবলিগী জামাত গোচৰত ৪১জন বিদেশী নাগৰিকৰ বিৰুদ্ধে ১২ অভিযোগনামা দাখিল কৰিছে দিল্লী আৰক্ষীয়ে৷ ইয়াৰ পূর্বে দিল্লী আৰক্ষীৰ অপৰাধ শাখাই ৯০০তকৈ অধিক তবলিগী জামাতৰ বিদেশী নাগৰিকৰ বিৰুদ্ধে ৪৭খন অভিযোগনামা দাখিল কৰিছিল৷ ইতিমধ্যে দিল্লী আৰক্ষীয়ে দাখিল কৰা এই অভিযোগনামাৰ ভিত্তিত আদালতে অভিযুক্তৰ বিৰুদ্ধে জাননী জাৰি কৰিছে৷ আদালতে এই গোচৰৰ শুনানি অহা ২৫ জুন আৰু জুলাইৰ শেষৰ ফালে গ্রহণ কৰিব৷ তাৎপর্যপূর্ণ যে এই অভিযুক্ত তবলিগী জামাতৰ সদস্যসকল ৩৬খন বিদেশ ৰাষ্ট্রৰ পৰা আহিছিল৷ বিদেশী নাগৰিককেইগৰাকীৰ বিৰুদ্ধে গোচৰ ৰুজু কৰি অভিযোগনামা দাখিল কৰিলেও এতিয়ালৈকে কোনো এজনকে গ্রেপ্তাৰ কৰা হোৱা নাই বুলি দিল্লী আৰক্ষীয়ে প্রকাশ কৰিছে৷ আৰক্ষীয়ে প্রকাশ কৰা মতে, তবলিগী জামাতৰ সদস্যসকলে কেন্দ্রীয় আৰু দিল্লী চৰকাৰে ক’ভিড–১৯ৰ বাবে বলৱৎ কৰা লকডাউনৰ নীতি–নির্দেশনা উলংঘা কৰিছিল৷ সেয়েহে এই বিদেশী লোককেইজনৰ বিৰুদ্ধে মহামাৰী দুর্যোগ আইন, দুর্যোগ ব্যৱস্থাপনা আইন আৰু ভাৰতীয় দণ্ডবিধিৰ কেইবাটাও ধাৰাত গোচৰ ৰুজু কৰা হৈছে৷