নিয়মীয়া বাৰ্তা,৪ ডিচেম্বৰঃ মহাৰাষ্ট্রত বিজেপি–শিৱসেনাৰ মিত্রতাৰ পতনৰ পিছত ঝাৰখণ্ডত আজছু মুৰব্বী সুদেশ মাহাতোৱে মুখ্যমন্ত্রী পদ দখলৰ সপোন দেখিবলৈ লৈছে ৷ ক্রীড়া ক্ষেত্রৰ সৈতে জড়িত আজছুৰ সভাপতি সুদেশ মাহাতোৰ আছে ৰাজ্যখনৰ ৰাজনীতিত বিশেষ প্রভাৱ ৷ বর্তমান বীৰছা মুণ্ডা আর্চাৰী একাডেমী পৰিচালনা কৰি আছে মাহাতোৱে ৷ উল্লেখনীয় যে ২০১৪ চনত আজছুৰ সহযোগিতাতেই বিজেপিয়ে ঝাৰখণ্ডত ক্ষমতা দখল কৰিবলৈ সক্ষম হৈছিল ৷ ৮১ আসন বিশিষ্ট ৰাজ্যখনৰ বিধানসভা নির্বাচনৰ প্রথমটো পর্যায়ত ভোটগ্রহণ ইতিমধ্যে সমাপ্ত হৈছে ৷ আগন্তুক ৭ ডিচেম্বৰত ৰাজ্যখনত দ্বিতীয় পর্যায়ৰ নির্বাচন অনুষ্ঠিত হ’ব ৷ ইয়াৰ পূর্বে আজছু মুৰব্বীগৰাকীয়ে ৰাজ্যখনত মুখ্যমন্ত্রী পদ দখলৰ বাবে প্রবল দাবীদাৰ হৈ পৰা বুলি বিভিন্ন মহলে উল্লেখ কৰিছে ৷ অর্থাৎ ঝাৰখণ্ডৰ নির্বাচনত যদি এইবাৰ বিজেপিয়ে আশানুৰূপ ফল দেখুৱাবলৈ সক্ষম নহয়, তেন্তে আজছুৰ নেতাগৰাকীয়ে হ’ব মুখ্যমন্ত্রী পদৰ প্রবল দাবীদাৰ ৷