নিয়মীয়া বাৰ্তা, ১৯ ডিচেম্বৰঃ ২০০৮ চনত ৰাজস্থানৰ জয়পুৰত সংঘটিত ধাৰাবাহিক বোমা বিস্ফোৰণৰ গোচৰত চাৰিজন অভিযুক্তক দোষী সাব্যস্ত কৰিছে এখন বিশেষ আদালতে ৷ উল্লেখনীয় যে এই বিস্ফোৰণত ৭২গৰাকী লোক নিহত হোৱাৰ উপৰি অন্য ১৭০গৰাকী আহত হৈছিল ৷ এই গোচৰটোত এজন অভিযুক্তক মুক্তি দিছে আদালতখনে ৷ এই অভিযুক্তজনৰ বিৰুদ্ধে আদালতে কোনোধৰণৰ প্রামাণিক তথ্য লাভ নকৰিলে ৷
উল্লেখনীয় যে ভাৰতীয় দণ্ডবিধি (আইপিচি), বে–আইনী কামকাজ প্রতিৰোধ আইন, বিস্ফোৰক আইন আৰু পিডিপিপি আইনৰ বিভিন্ন ধাৰাৰ অধীনত চাৰি অভিযুক্তক গোচৰটোত দোষী সাব্যস্ত কৰা হৈছে ৷ দোষী সাব্যস্ত হোৱা লোককেইজন হৈছে মহম্মদ শ্বাহবাজ হুছেইন, মহম্মদ ছাইফ ওৰফে কাৰিয়ন, মহম্মদ ছাৰৱাৰ আজমী আৰু মহম্মদ ছাইফ ওৰফে ছাইফুৰ ৰহমান আনছাৰি ৷ উল্লেখনীয় যে এই বিস্ফোৰণ সন্দর্ভত ৮টাকৈ গোচৰ ৰুজু কৰা হৈছিল ৷ ৰাজস্থান এটিএছে বিস্ফোৰণত জড়িত বুলি ৫জন লোকৰ বিৰুদ্ধে চার্জশ্বিট দাখিল কৰিছিল আদালতত৷ শীঘ্রে আদালতখনে শাস্তি ঘোষণা কৰিব চাৰিওজন দোষী সাব্যস্ত লোকৰ বিৰুদ্ধে ৷