নিয়মীয়া বার্তা, ১১ মেঃ ছিকিম সীমান্তত ভাৰত আৰু চীনৰ সেনাৰ মাজত সংঘটিত হতাহতি আৰু গঁতিয়াগঁতি ঘটনাক লৈ পুনৰ উত্তেজনা সৃষ্টি হয়৷ উল্লেখনীয় যে ১৬ হাজাৰ ফুটতকৈ ওখ দুর্গম স্থানত চীনা সৈন্যৰ সৈতে ভাৰতীয় সেনাৰ প্রায় ২০জন জোৱানে এই সংঘাতত জড়িত হৈ পৰে৷ উত্তৰ ছিকিমৰ দুর্গম সীমান্তত সংঘটিত এই ঘটনাৰ পাছতে দেশজুৰি সৃষ্টি হয় প্রতিক্রিয়া৷
স্থলসেনাৰ তৰফৰ পৰা প্রকাশ কৰা অনুসৰি উভয় দেশৰ জোৱানসকলৰ শিল দলিওৱাৰ ঘটনাও সংঘটিত হয়৷ অঞ্চলটোত প্রকৃত নিয়ন্ত্রণ ৰেখাত (এল এ চি) উভয় দেশৰ সেনাৰ মাজত সঘনে মতানৈক্য চলি আহিছে৷ এই উত্তেজনাৰ ঘটনাটোৰ ভিডিঅ’ গ্রহণ কৰে এগৰাকী ভাৰতীয় সেনাৰ জোৱানে৷ স্থলসেনাৰ তৰফৰ পৰা প্রকাশ কৰা এই বিবৃতিত উল্লেখ কৰা হৈছে যে উভয় পক্ষৰ জোৱানসকলৰ এই হতাহতি আৰু আগ্রাসী আচৰণৰ ফলত কেইবাজনো আহত হৈছে৷
অৱশ্যে আহত জোৱানসকলৰ আঘাত গুৰুতৰ নহয় বুলি বিবৃতিটোত উল্লেখ কৰা হৈছে৷ তাৎক্ষণিকভাৱে দুই দেশৰ সেনা বিষয়াই ঘটনাস্থলীতে আলোচনাত মিলিত হোৱাৰ লগে লগে এই উত্তেজনাৰ অৱসান ঘটে বুলিও বিবৃতিটোত স্পষ্ট কৰা হৈছে৷ উল্লেখনীয় যে ২০১৭ৰ আগষ্টত ডোকলাম মালভূমিত ভাৰত–চীনৰ সেনাৰ মাজত এনে হতাহতিৰ ঘটনাই দুয়োখন দেশৰ মাজত যুদ্ধ আশংকা সৃষ্টি কৰিছে৷ ৭৩ দিন ধৰি ডোকলামৰ ঘটনাক কেন্দ্র কৰি ভাৰত–চীন আৰু ভূটানৰ মাজত সৃষ্টি হৈছিল উত্তেজনা৷ ২০১৮ চনৰ মে’ত য়ুহানত ভাৰতৰ প্রধানমন্ত্রী মোদী আৰু চীনা ৰাষ্ট্রপতি জিনপিং অনানুষ্ঠানিক বৈঠকত মিলিত হোৱাত এই উত্তেজনাৰ অৱসান ঘটিছিল৷