নিয়মীয়া বাৰ্তা, ২৮ জানুৱাৰীঃ সদৌ অসম ছাত্র সন্থাই বড়ো সমস্যাৰ শান্তিপূর্ণ স্থায়ী সমাধান হোৱাটো বিচাৰে৷ নিশ্চয় ৰাজনৈতিকভাৱেই বিষয়টোৰ সমাধান হ’ব লাগিব, কিন্তু একে সময়তে বিটিআৰত বসবাস কৰা অন্যান্য খিলঞ্জীয়া জনজাতি–জনগোষ্ঠীস অধিকাৰসমূহো সুৰক্ষিত হ’ব লাগিব৷ এই মন্তব্য আছুৰ সম্পাদক লুৰিণজ্যোতি গগৈৰ৷
সোমবাৰে স্বাক্ষৰ হোৱা বড়ো শান্তি সন্দর্ভত নিজৰ মতামত প্রকাশ কৰি আছু নেতাগৰাকীয়ে লগতে কয় যে বি টি আৰত বসবাস কৰা সকলো ৰাইজে শান্তি আৰু ভাতৃত্ববোধৰ মাজেৰে আগবাঢ়িব লাগিব৷ কাৰণ অকলে কোনো জীয়াই থাকিব নোৱাৰে৷ সেইবাবে বড়ো জনজাতিৰ আত্মনিয়ন্ত্রণৰ অধিকাৰ সুৰক্ষিত হোৱাৰ লগে লগে আন আন জনগোষ্ঠী–জনজাতিস ভূমি, চাকৰি–বাকৰি, ব্যৱসায় আদিৰ লগতে সকলো সংবিধানপ্রদত্ত অধিকাৰো সুৰক্ষিত হ’ব লাগিব৷