নিয়মীয়া বার্তা, ২৪ জানুুৱাৰীঃ শিৱসাগৰ জিলাৰ আমগুৰি ফুটবল প্রশিক্ষণ কেন্দ্রৰ খেলুৱৈ ভাস্কৰ গগৈয়ে সদ্যসমাপ্ত তৃতীয় খেলো ইণ্ডিয়া য়ুথ গেমছত অংশগ্রহণ কৰি আমগুৰিৰ লগতে বৃহত্তৰ চেলেংহাট অঞ্চললৈ গৌৰৱ কঢ়িয়াই আনিবলৈ সক্ষম হৈছে৷
ৰাষ্ট্রীয় পর্যায়ৰ প্রতিযোগিতাখনৰ ফুটবলত অসম দলক প্রতিনিধিত্ব কৰিছিল ভাস্কৰ গগৈয়ে৷ উল্লেখ্য যে ১৭ বছৰ অনূর্ধ্ব অসম ফুটবল দলক দ্বিতীয়বাৰৰ বাবে প্রতিনিধিত্ব কৰি ভাস্কৰ গগৈয়ে খেলো ইণ্ডিয়াত ৰানার্ছ–আপৰ সন্মান লাভ কৰে৷ প্রতিযোগিতাখনত উদীয়মান খেলুৱৈগৰাকীয়ে আজি আমগুৰিত উপস্থিত হোৱাৰ লগে লগে বিভিন্ন দল–সংগঠনে উষ্ম আদৰণি জনায়৷ পুতুল গগৈ আৰু ভাৰতী গগৈৰ সন্তান ভাস্কৰক আমগুৰি ফুটবল প্রশিক্ষণ কেন্দ্রৰ শশাংক গগৈৰ লগতে ৰাষ্ট্রীয় খেলুৱৈ পঞ্চমী বৰুৱাকে ধৰি কেইবাজনো বিশিষ্ট ব্যক্তিয়ে আদৰণি জনায়৷