নিয়মীয়া বাৰ্তা, ৩০ জুলাই : কামৰূপ জিলাৰ ছয়গাঁও আৰক্ষীয়ে গোপন তথ্যৰ ভিত্তিত আজি দুপৰীয়া ছয়গাঁও গুমি পথত বাইকখনত ছয়গাঁৱলৈ আহি থকা অৱস্থাত বাইক সহ যুৱক দুজনক আটক কৰে ৷ আটক কৰা লোক দুজন হ’ল শুৱালকুছি নদী আৰক্ষী চকীৰ অন্তৰ্গত ভাটখোৱাদিয়া চৰৰ ওহাৱ আলী আৰু গৰৈমাৰী আৰক্ষী চকীৰ অন্তৰ্গত লাৰুৱাজানৰ ছহিদুল ইছলাম ৷
জানিব পৰা মতে বৰতেজপুৰৰ আই টি চিত কৰ্মৰত ছয়গাঁৱৰ এগৰাকী যুৱকৰ এ এছ ০১ বি এছ ৮৪০৪ নম্বৰৰ য়ামাহা বাইকখন যোৱা ৬ জুনত আই টি চিৰ সন্মুখৰ পৰা চুৰি হৈছিল ৷ উক্ত দিনাই পলাশবাৰী আৰক্ষী থানাত এটি গোচৰ ৰুজু কৰা হয় ৷
উক্ত গোচৰৰ ভিত্তিত পলাশবাৰী আৰু ছয়গাঁও আৰক্ষীয়ে বাইক খনৰ সন্ধানত অনুসন্ধান অব্যাহত ৰাখিছিল ৷ আজি উক্ত লোক দুজনক ছয়গাঁও আৰক্ষীয়ে আটক কৰিবলৈ সক্ষম হয় ।