নিয়মীয়া বাৰ্তা, ১৪ মাৰ্চঃ জখলাবন্ধাত শনিবাৰে নিশা সংঘটিত হোৱা এক ভয়ংকৰ দুর্ঘটনাত প্রাণ গ’ল তিনিজনকৈ ছাত্রৰ৷ নিশা প্রায় ৯ বজাত সংঘটিত বাইক আৰু ট্রাকৰ মুখামুখি সংঘর্ষত যুৱককেইজনৰ মৃত্যু হয়৷ এ এছ–০২ টি–৯৩০৫ নম্বৰৰ এখন এনফিল্ড বুলেটেৰে তিনিওজন যুৱক গৈ থকাৰ সময়ত যোৰহাট অভিমুখী এ এছ ০৫ চি–২১৮৬ নম্বৰৰ ট্রাকখনৰে সৈতে মুখামুখি সংঘর্ষ ঘটে৷ তিনিওজনৰে থিতাতে মৃত্যু হয়৷ জখলাবন্ধা আৰক্ষী নিৱেশৰ সমীপৰ হাস্পতাল চাৰিআলিত এই শোকাৱহ দুর্ঘটনাটো সংঘটিত হয়৷ মৃত্যু হোৱা যুৱককেইজন হ’ল– দুলাল মাধৱ গাঁৱৰ ৰিকু শইকীয়া (২১), কুঁৱৰীটোলৰ ধূর্জটি ভূঞা (২১) আৰু লালন প্রসাদ ৰবিদাস (২১)৷
উল্লেখ্য যে নিহত তিনিওজন যুৱক কলিয়াবৰ মহাবিদ্যালয়ৰ ছাত্র৷ দুর্ঘটনাটোত এই ছাত্র তিনিজনৰ মৃত্যুত সমগ্র অঞ্চলত শোকৰ ছাঁ পৰিছে৷