নিয়মীয়া বাৰ্তা,৯ মাৰ্চ: ঢকুৱাখনাত উৰিছে শাসকীয় দল বিজেপিৰ বিজয়ধ্বজা।পৌৰসভা নিৰ্বাচনত ঢকুৱাখনা পৌৰসভাত এখনো আসন নাপালে কংগ্ৰেছ দলে।আজি ঘোষিত পৌৰসভা নিৰ্বাচনৰ ফলাফলত শাসক দল বিজেপিয়ে ঢকুৱাখনা পৌৰ সভাৰ মুঠ ১০ টা ৱাৰ্ডৰ ভিতৰত ৯ টা ৱাৰ্ডতে নিৰংকুশ বিজয় সাব্যস্ত কৰিছে। ১ নম্বৰ ৱাৰ্ডত নিৰ্দলীয় প্ৰাৰ্থী বগেন কোঁৱৰে জয়লাভ কৰাৰ বিপৰীতে বাকী ৯ টা ৱাৰ্ডতে জয়ী হৈছে বিজেপিৰ প্ৰাৰ্থী।বিজেপিৰ ২ নম্বৰ ৱাৰ্ডৰ প্ৰাৰ্থী গুনলতা কুটুম , ৩ নম্বৰ ৱাৰ্ডৰ প্ৰাৰ্থী সংগীতা বৰুৱা, ৪নম্বৰ ৱাৰ্ডৰ প্ৰাৰ্থী মাণিক বৰুৱা , ৫ নম্বৰ ৱাৰ্ডৰ প্ৰাৰ্থী তিলেন দাস ,৬নম্বৰ ৱাৰ্ডৰ প্ৰাৰ্থী স্বৰূপ কোঁৱৰ , ৭ নম্বৰ ৱাৰ্ডৰ প্ৰাৰ্থী চন্দ্ৰমা গগৈ , ৮ নম্বৰ ৱাৰ্ডৰ প্ৰাৰ্থী দিপালি দাস , ৯নং ৱাৰ্ডৰ প্ৰাৰ্থী অপৰূপা দিহিঙীয়া দত্ত আৰু ১০ নম্বৰ ৱাৰ্ডৰ প্ৰাৰ্থী ৰাজীৱ দাসে বিজয় সাব্যস্ত কৰিবলৈ সক্ষম হৈছে । উল্লেখ্য যে ঢকুৱাখনা পৌৰ সভাৰ নিৰ্বাচনত কংগ্ৰেছৰ মুঠ ১০ গৰাকী ৰাইজৰ দল আৰু নিৰ্দলীয়ৰ পঢ়ক এগৰাকী প্ৰাৰ্থী মুঠ ২২ গৰাকী প্ৰাৰ্থীয়ে নিৰ্বাচনী যুঁজত অৱতীৰ্ণ হৈছিল।ইফালে স্থানীয় বিধায়ক নৱ কুমাৰ দলেই সকলো বিজয়ী প্ৰাৰ্থীলৈ আন্তৰিক অভিনন্দন তথা ভৱিষ্যৎ দিনৰ বাবে শুভেচ্ছা জ্ঞাপন কৰিছে। একক সংখ্যা গৰিষ্ঠতাৰে পৌৰ সভা গঠনৰ দিশে অগ্ৰসৰ হোৱাৰ আনন্দত ঢকুৱাখনা বিজেপিত আনন্দৰ বন্যা বৈছে । ঢকুৱাখনা মহকুমাধিপতি কাৰ্যালয়ত ভোটগননা সমাপ্ত কৰি বিজেপিৰ বিজয়ী প্রাৰ্থীক লগত লৈ বৃহৎ সংখ্যক সমৰ্থকে ঢকুৱাখনা জিলা বিজেপিৰ কাৰ্যলয়লৈ বিজয় ৰেলী উলিওৱাৰ সমান্তৰালকৈ ফটকা আটছবাজী ফুটাই আবতৰিয়া দেৱালীৰ সৃষ্টি কৰে।
প্ৰেৰকঃ পুলকজ্যোতি বৰা