নিয়মীয়া বাৰ্তা, ২৮ মে’ :: নলবাৰীৰ উপ আৰক্ষী অধীক্ষক (সদৰ) জিকিৰানী মহন্তৰ নেতৃত্বত দৌলাশাল আৰক্ষীয়ে অভিযান চলাই কালি নিশা গ্ৰেপ্তাৰ কৰিছে এটা জুৱাৰীক ৷ আৰক্ষীয়ে বৰক্ষেত্ৰীৰ বৰলিয়াপাৰৰ পৰা গ্ৰেপ্তাৰ কৰিছে আইপিএল জুৱাৰীটোক ৷ ধৃত জুৱাৰীটো মুকালমুৱা আৰক্ষী থানাৰ অন্তৰ্গত মেৰুৱাট্টাৰী গাঁৱৰ জাইদুৰ ৰহমান ওৰফে জানো বুলি জানিব পৰা গৈছে ৷ আৰক্ষীয়ে নিৰ্ভৰযোগ্য সূত্ৰৰ খবৰৰ ভিত্তিত কালি নিশা অভিযান চলাই ধৃত জাইদুৰ ৰহমানক গ্ৰেপ্তাৰ কৰি সোধ-পোচ কৰাত পোহৰলৈ আহিছে আন কেবাটাও জুৱাৰীৰ তথ্য ৷ নলবাৰীৰ উপ আৰক্ষী অধীক্ষক জিকিৰানী মহন্তই ধৃত জুৱাৰী জাইদুৰ ৰহমানৰ ম’ৱাইল ফোনটো জব্দ কৰি চোৱাচিতা কৰাত আন কেবাটাও জুৱাৰীৰ তথ্য লাভ কৰিছে ৷ আৰক্ষীৰ মাৰাথান জেৰাত ধৃত জাইদুৰ ৰহমানে আন কেইবাটাও জুৱাৰীৰ নাম-ঠিকনা প্ৰকাশ কৰিছে বুলি জানিব পৰা গৈছে ৷ দৌলাশাল আৰক্ষীয়ে আইপিএল জুৱাৰী ধৃত জাইদুৰ ৰহমানৰ বিৰুদ্ধে মুকালমুৱা আৰক্ষী থানাত গোচৰ ৰুজু কৰাত আৰক্ষীয়ে ধৃত জুৱাৰীটোক আজি নলবাৰী আদালতত হাজিৰ কৰি জুৱাৰীটোক এদিনৰ বাবে আৰক্ষীৰ জিম্মাত লৈ আন জুৱাৰী কেইটাৰ সন্ধানত অনুসন্ধান চলাইছে ৷