নিয়মীয়া বাৰ্তা,১৮ মাৰ্চঃ দৰঙৰ ছিপাঝাৰ থানাৰ অন্তৰ্গত দেওমৰনৈ মাউতপাৰা চুবুৰীৰ ২৭ বছৰীয়া যুৱক হীৰকজ্যোতি বৰাই শেহতীয়াকৈ আলফাত যোগদানৰ আশংকা কৰিছে। ৯ মাৰ্চতে ঘৰৰ পৰা আতৰি যোৱা হীৰকে ৩ মাহ পাছতহে পৰিয়ালক যোগাযোগ কৰিব বুলি পিতৃ ভদ্ৰ বৰাক কৈ আতৰি যায়। মনকৰিবলগীয়া যে, স্হানীয় বিদ্যালয়ৰ পৰা উচ্চতৰ উৰ্ত্তীন হীৰকে বিগত কিছুদিন কল, কমলা আদি ফলমূলৰ দোকান দি আহিছিল। বিগত লকডাউনৰ পূৰ্বে গুজৰাটৰ চুৰাট আৰু পাছলৈ বাংগালোৰৰ এক কোম্পানীত দিন হাজিৰা কৰিছিল। পৰিয়ালৰ একমাত্ৰ পুত্ৰ হীৰকক আলফাই সদস্য হিচাবে নলৈ ঘৰলৈ ওভতাই পঠাবলৈ আলফা স্বাধীনৰ স্বয়ম্ভূ সেনাধ্যক্ষ পৰেশ বৰুৱাক গোহাৰি জনাইছে।