নিয়মীয়া বাৰ্তা, ১২ ডিচেম্বৰ: নগাঁও চহৰৰ এখন মটৰচাইকেল বিক্ৰী প্ৰতিষ্ঠানৰ পৰা চোৰে এখন বিলাসী বাইক চুৰি কৰা ঘটনাই চাঞ্চল্যৰ সৃষ্টি কৰিছে । অৱশ্যে আৰক্ষীয়ে চুৰি বাইকখন উদ্ধাৰ কৰাৰ লগতে বাইক চোৰৰ লগত জৰিত এজন চোৰক গ্ৰেপ্তাৰ কৰিবলৈ সক্ষম হয়। জানিব পৰা মতে হয়বৰগাও আৰক্ষী চকীৰ সন্মূখতে থকা ফিউচাৰ বাইক য়ামাহা নামৰ প্ৰতিষ্ঠানখনৰ পৰা কালি দিন দুপৰতে চোৰে আৰ-১৫ নামৰ এখন বিলাসী বাইক চোৰে চুৰ কৰি লৈ যায়। চোৰে অতি কৌশলেৰে প্ৰতিষ্ঠানটোৰ পৰা লক্ষাধিক টকাৰ মূল্যৰ বাইকখন চুৰি কৰে । চুৰি কাণ্ডৰ সমগ্ৰ দৃশ্য বন্দী হয় প্ৰতিষ্ঠানটোৰ চি চি টিভি কেমেৰাত । ইমাৰ পিছতেই প্ৰতিষ্ঠানখনৰ কৰ্তৃপক্ষই চিচি টিভিৰ ভিজুৱেল সহ হয়বৰগাও আৰক্ষী চকীত এজাহাৰ দাখিল কৰে । এই এজাহাৰ ভিত্তিত হয়বৰগাও থানাৰ আৰক্ষীয়ে যোৱা নিশা অভিযান চলায় । হয়বৰগাও আৰক্ষী থানাৰ ভাৰপ্ৰাপ্ত বিষয়া তৰংগ পাটোৱাৰীৰ নেতৃত্বত যোৱা আৰক্ষীৰ দলে নগাঁও চহৰৰ মোল্লাপট্টিত অভিযান চলাই দুৰ্ধষ চোৰটোক বাইক সহ গ্ৰেপ্তাৰ কৰিবলৈ সক্ষম হয়। আৰক্ষীয়ে গ্ৰেপ্তাৰ কৰা চোৰটোৰ নাম আৰৱ আলী শ্বেখ । আৰক্ষীয়ে বৰ্তমান চোৰটোক জেৰা অব্যাহত ৰাখিছে ।