নিয়মীয়া বাৰ্তা, ২৪ আগষ্ট: নগাঁৱত বৃদ্ধি পোৱা ড্রাগ্ছৰ ঘাটি উচ্ছেদ কৰিবলৈ আৰক্ষী তৎপৰ হোৱাৰ পিছতো অব্যাহত আছে ড্রাগ্ছৰ ব্যৱসায় আৰু সেৱন৷ সোমবাৰে নগাঁৱৰ তিনিগৰাকী কিশোৰীয়ে সাহসিকতাৰ পৰিচয় দি আটক কৰিবলৈ সক্ষম হয় দুই ড্রাগ্ছ সেৱনকাৰীক৷ বিয়লি নগাঁৱৰ নেহৰুৱালীত ক্রীডা অনুশীলন কৰি থকা সময়ত কিশোৰীকেইগৰাকীয়ে দুজন যুৱকে ড্রাগ্ছ সেৱন কৰি থকা প্রত্যক্ষ কৰে৷
লগে লগে তিনি কিশোৰী ক্রমে ৰুবিত্রা পাটৰ, ইন্নাচ বেগম আৰু শিল্পী শিখা বৰাই সাহসিকতাৰ পৰিচয় দি ড্রাগ্ছ সেৱনকাৰী যুৱক দুজনক আটক কৰিবলৈ সক্ষম হয়৷ পিছত একাংশ লোকে উত্তম–মধ্যম শোধাই ড্রাগ্ছ সেৱনকাৰী দুজনক আৰক্ষীক গতাই দিয়ে৷ দুই ড্রাগ্ছ সেৱনকাৰীক আটক কৰা তিনি কিশোৰীক চকলেট উপহাৰ দিয়ে আৰক্ষী অধীক্ষক আনন্দ মিশ্রই৷