নিয়মীয়া বাৰ্তা, ৭ জানুৱাৰী: আজি বিয়লি নগাঁও চহৰৰ সমীপৰ বৰভেটিত এক ভয়ংকৰ পথ দুৰ্ঘটনা সংঘটিত হয়। এই দুৰ্ঘটনাত এজন ছাত্ৰ থিতাতে নিহত হোৱাৰ লগতে আন এজন ছাত্ৰ গুৰুতৰ ভাৱে আহত হয়। নগাঁৱৰ যান-বাহন আৰক্ষী বিভাগৰ সূত্ৰই জনোৱা মতে, “আজি বিয়লি এ এছ ৩১ বি ৬৯১০ নম্বৰৰ য়ামাহা বাইকেৰে নগাঁও চহৰৰ পৰা ছাত্ৰ দুজন গৈ থকা অৱস্থাত এই পথ দুৰ্ঘটনা সংঘটিত হয়।” সূত্ৰটোৱে জনোৱা মতে, “মটৰ চাইকেল আৰোহি গোপাল শইকীয়াই বৰভেটিত এখন ই-ৰিক্সাত আৰু এখন ঠেলাত খুন্দা মৰাৰ ফলত এই দুৰ্ঘটনা সংঘটিত হয়। দুৰ্ঘটনাটোত গোপাল শইকীয়া নামৰ ছাত্ৰ জন থিতাতে নিহত হয়। নিহত গোপাল শইকীয়াৰ ঘৰ ফুলগুৰিত বুলি জানিব পৰা গৈছে। আনহাতে বাইক খনৰ পিছফালে বহি যোৱা মানবেন্দ্ৰ নাথ নামৰ ছাত্ৰ জন গুৰুতৰ ভাৱে আহত হয়। সংকটজনক অৱস্থাত গুৰুতৰ ভাৱে আহত ছাত্ৰ জনক উন্নত চিকিৎসাৰ বাবে গুৱাহাটীলৈ প্ৰেৰণ কৰা হৈছে। আহত মানবেন্দ্ৰ নাথৰ ঘৰ নগাঁও চহৰৰ সমীপৰ জামগুৰিত। দুইজন ছাত্ৰ নগাঁও চহৰৰ এখন কণিষ্ঠ মহাবিদ্যালয়ৰ ছাত্ৰ বুলি জানিব পৰা গৈছে।