নিয়মীয়া বাৰ্তা, ২১ জানুৱাৰীঃ পূৰ্ণ গতিত চলিছে ধুবুৰী–ফুলবাৰী দলংৰ নিৰ্মাণৰ কাম। অত্যাধুনিক যন্ত্ৰপাতিৰে দ্ৰুত গতিত চলিছে ব্ৰহ্মপুত্ৰৰ ওপৰেদি দেশৰ সৰ্ববৃহৎ এই দলংখনৰ নিৰ্মাণ কাৰ্য্য। অসমৰ নামনিৰ ধুবুৰী আৰু চুবুৰীয়া মেঘালয়ৰ পশ্চিম গাৰো পাহাৰ জিলাৰ তুৰা সংযোগী নিৰ্মীয়মান এই দলংখনৰ নিৰ্মাণৰ কাম ২০২৬/২৭ চনৰ ভিতৰত সম্পূৰ্ণ কৰাৰ লক্ষ্য বান্ধি লোৱা হৈছে।
নৰ্থ-ইষ্ট ৰোড নেটওৱৰ্ক কানেক্টিভিটী’ আঁচনিৰ তৃতীয় পৰ্যায়ৰ অধীনত ‘‘জাপান ইন্টাৰনেচনেল কৰপোৰেচন এজেঞ্চী’’ (চমুকৈ জাইকা)ৰ বিত্তীয় সাহায্যত নিৰ্মাণ কৰা থকা এই দলংখনৰ নিৰ্মাণ মূল্য ৰূপে ধাৰ্য কৰা হৈছে মুঠ ৪৯৯৭.০৪ কোটি টকা। ধুবুৰী চহৰৰ পাৰ্শ্বৱৰ্তী আদাবাৰী দ্বিতীয় খণ্ডৰ পৰা ব্ৰহ্মপুত্ৰৰ ওপৰেদি নিৰ্মাণ কৰি থকা হোৱা এই দলংখনৰ নিৰ্মাণৰ দায়িত্ব লাভ কৰিছে এল এণ্ড টি নামৰ বহুজাতিক নিৰ্মাণকাৰী সংস্থা এটাই।
১৯.২৮২ কিলোমিটাৰ দৈৰ্ঘ্যৰ এই দলংখনৰ নিৰ্মাণ সম্পূৰ্ণ হ’লে ফুলবাৰীলৈ ব্ৰহ্মপুত্ৰৰ উজনিমুৱা কেইবাঘন্টীয়া নাওঁ যাত্ৰা মাথো ১৫-২০ মিনিটমানতেই সম্পূৰ্ণ কৰা সম্ভৱপৰ হৈ উঠিব। স্মৰ্তব্য যে, ২০১৯ চনৰ ২৮ ফেব্ৰুৱাৰীৰ দিনা দেশৰ প্ৰধানমন্ত্ৰী নৰেন্দ্ৰ মোডীৰ অধ্যক্ষতাত বহা কেন্দ্ৰীয় কেবিনেটে ধুবুৰী-ফুলবাৰী সংযোগী এই দলংখনৰ নিৰ্মাণৰ কামৰ অনুমোদন জনোৱাৰ পিছত মাথো দুই বছৰৰ ভিতৰতেই দলংখন নিৰ্মাণৰ বাবে প্ৰয়োজনীয় ভূমি অধিগ্ৰহণকে ধৰি অত্যাধুনিক থ্ৰিজি (3G) জৰীপৰ কাম সম্পূৰ্ণ কৰা হৈছিল।
বিগত বছৰৰ ১৮ ফেব্ৰুৱাৰীৰ দিনা দেশৰ প্ৰধানমন্ত্ৰী নৰেন্দ্ৰ মোদীয়ে দিল্লীৰ পৰা ভাৰ্চুয়েল মাধ্যমযোগে আনুষ্ঠানিক ভাৱে শুভাৰম্ভ কৰিছিল বহু প্ৰত্যাশিত ধুবুৰী–ফুলবাৰী দলংখনৰ নিৰ্মাণৰ কাম। উল্লেখনীয় যে, কেৱল যাতায়াতৰ ক্ষেত্ৰতেই নহয়; এই দলংখনে বৃহত্তৰ অঞ্চলটোৰ আৰ্থ সামাজিক দিশলৈ এক সূদুৰপ্ৰসাৰী প্ৰভাৱ পেলোৱাৰ সমান্তৰালকৈ পৰ্যটনৰ ক্ষেত্ৰখনতো নতুন দিগন্তৰ সূচনা কৰাটো প্ৰায় নিশ্চিত। এই দলংখনে উত্তৰ–পূৰ্বাঞ্চলৰ বাণিজ্যিক বিকাশৰ ক্ষেত্ৰত সুদূৰ প্ৰসাৰী প্ৰভাৱ পেলাব বুলি আশা কৰাৰ সমান্তৰালকৈ চুবুৰীয়া বাংলাদেশৰ সৈতেও আমদানি–ৰপ্তানিৰ ক্ষেত্ৰতো দলংখনে এক গুৰুত্বপূৰ্ণ ভূমিকা লোৱাৰো সম্ভাৱনা আছে।
প্ৰেৰকঃ অমিতাভ চক্ৰৱৰ্তী, ধুবুৰী