নিয়মীয়া বাৰ্তা, ৮ জুলাইঃ পেট্ৰল-ডিজেলৰ মূল্য বৃদ্ধিৰ প্ৰতিবাদত নগাঁও জিলাত কংগ্ৰেছ দলে ধাৰাবাহিক ভাবে প্ৰতিবাদ অব্যাহত ৰাখিছে। আজি এন এছ ইউ আইৰ উদ্যোগত নগাঁৱত কংগ্ৰেছৰ নেতা কৰ্মীৰ লগতে এন এছ ইউ আই, যুৱ কংগ্ৰেছ, মহিলা কংগ্ৰেছৰ সদস্য সকলে পেট্টল ডিজেলৰ মূল্য বৃদ্ধিৰ বিৰুদ্ধে উত্তাল প্ৰতিবাদ সাব্যস্ত কৰে। নগাঁও সদৰ পৌৰ ব্লক কংগ্ৰেছৰ কাৰ্যালয় আৰু নগাঁও সদৰ থানাৰ সন্মুখত বাটৰ নাট প্ৰদৰ্শন কৰি কংগ্ৰেছ দলে প্ৰতিবাদ সাব্যস্ত কৰে।
‘প্ৰধানমন্ত্ৰী নৰেন্দ্ৰ মোডী হায় হায়’, ‘পেট্টলিয়াম মন্ত্ৰী ধৰ্মেন্দ্ৰ প্ৰধান হায় হায়’, ‘বিজেপি মুৰ্দাবাদ’ আদি বিভিন্ন ধ্বনি দি ৰাজপথ উত্তাল কৰি তোলে। কংগ্ৰেছ কৰ্মী সকলে সাঙীত স্কুতি উঠাই প্ৰতীকি শ্মসান যাত্ৰা কৰি অভিনৱ প্ৰতিবাদী কাৰ্যসূচী ৰূপায়ন কৰে। এই কাৰ্যসূচীত প্ৰাক্তন মন্ত্ৰী ৰকিবুল হুছেইন, প্ৰাক্তন বিধায়ক ডাঃ দুৰ্লভ চমুৱাকে ধৰি বহু কেইজন কংগ্ৰেছ নেতাই অংশ গ্ৰহণ কৰে। কাৰ্যসূচীত অংশ গ্ৰহণ কৰি কংগ্ৰেছ নেতা ৰকিবুল হুছেইন আৰু ডা: দুৰ্ল্লভ চমুৱাই বিজেপি চৰকাৰৰ বিৰুদ্ধে সৰব হৈ পৰি কয় – “বিজেপি চৰকাৰে পেট্ৰল ডিজেলৰ মূল্য বৃদ্ধি কৰি সৰ্বসাধাৰণ ৰাইজক মাধমাৰ সোধাইছে।” বিজেপি চৰকাৰৰ জনস্বাৰ্থ বিৰোধী কাৰ্যৰ বিৰুদ্ধে ৰাইজক ৰাজপথলৈ ওলাই আহিবলৈ দুয়োজন নেতাই আহ্বান জনায়। কাৰ্যসূচীৰ অন্তত নগাঁও জিলা এন এছ ইউ আই ৰ তৰফৰ পৰা পেট্টল ডিজেলৰ মূল্য বৃদ্ধি হ্ৰাস কৰাৰ দাবী জনাই নগাঁও জিলা উপায়ুক্তৰ জড়িয়তে ৰাষ্ট্ৰপতিলৈ এখন স্মাৰক পত্ৰ প্ৰেৰণ কৰে।