নিয়মীয়া বাৰ্তা, ১৭ জানুৱাৰীঃ কলিয়াবৰৰ বিহডুবিত অসম সমবায় মৰাপাট কলৰ দ্বিতীয়টো ইউনিট স্থাপনৰ কালি শুভাৰম্ভ কৰে৷ অসম সমবায় মৰাপাট কলৰ দ্বিতীয়টো গোটৰ প্রস্তুতিৰ কালি পুৱাই শুভাৰম্ভণি কৰে জলসম্পদ মন্ত্রী কেশৱ মহন্তই৷বন্ধ হৈ থকা কলিয়াবৰৰ বিহডুবি পলিয়েষ্টাৰ কল চৌহদত মন্ত্রী কেশৱ মহন্তই নতুন গোটটোৰ আনুষ্ঠানিকভাৱে প্রস্তুতিৰ শুভাৰম্ভণি কৰে৷ প্রায় ২২ বিঘা ভূমিত নতুনকৈ গোটটোৰ মৰাপাট কলটো স্থাপন হ’ব৷ ৩৫ কোটি টকা ব্যয়সাপেক্ষ অসম সমবায় মৰাপাট কলৰ দ্বিতীয়টো গোট স্থাপনক লৈ চলি থকা বিভিন্ন জল্পনা–কল্পনাৰ বাস্তৱ ৰূপ পোৱাৰ বাট মুকলি হ’ল৷ ইফালে, কালি দিনটোতে অসম সমবায় মৰাপাট কল, শিলঘাটে ৫০বর্ষ সম্পূর্ণ কৰে৷ এন চি ডি চি এলৰ পৰা পোৱা ছাবছিডী ঋণৰ জৰিয়তে নতুন মৰাপাট কলটো নির্মাণ হ’ব৷ তিনি মাহৰ ভিতৰত নতুন মৰাপাট কলটো সম্পূর্ণ হ’ব বুলি মন্ত্রী কেশৱ মহন্তই জানিবলৈ দিয়ে৷ কলটো হৈ উঠিলেবহু নিবনুৱা যুৱকে দ্বিতীয় কলটোত কর্মসংস্থাপন লাভ কৰিব বুলিও মন্ত্রীগৰাকীয়ে কয়৷