নিয়মীয়া বাৰ্তা, ৩ এপ্ৰিলঃ দেশৰ বিভিন্ন প্ৰান্তৰ লগতে অসমৰ পৰাও নিজামুদ্দিন মাৰ্কাজলৈ যোৱা ১৬ গৰাকী লোক ইতিমধ্যে ক’ৰোনাত আক্ৰান্ত হোৱা বুলি চিনাক্ত কৰা হৈছে । শোণিতপুৰ জিলাৰ ৪৩৫২ গৰাকী লোকক আছুতীয়াকৈ ৰখাৰ ব্যৱস্থা কৰা হৈছে ।
ইপিনে বৰ্তমানো দিল্লীৰ মাৰ্কাজত ধৰ্মীয় অনুষ্ঠানত অংশ লোৱা ৬ গৰাকী লোকক ইতিমধ্যে চিনাক্ত কৰা হৈছে যদিও এই লোকসকল বৰ্তমানেও জিলাখনত উপস্থিত হোৱা নাই বুলি উপায়ুক্তই জানিব দিছে ।
আনহাতে জিলাখনৰ প্ৰায় ৩৯ গৰাকী লোক এই অনুষ্ঠানত অংশ লোৱা বুলি সন্দেহ কৰা হৈছে যদিও ইয়াৰে দহগৰাকীৰ স্বাস্থ্য পৰীক্ষাৰ পাছত কভিড-১৯ ৰ পৰা মুক্ত বুলি নিশ্চিত হৈছে । পিচে বাকী ২৯ গৰাকী লোক ক’ত, কেনে অৱস্থাত আছে সেই সন্দৰ্ভত জিলা প্ৰশাসনে অনুসন্ধান অব্যাহত ৰাখিছে । অৱশ্যে ইয়াৰে ১৩ জনক উত্তৰ প্ৰদেশত সংশ্লিষ্ট বিভাগে স্বাস্থ্য পৰীক্ষাসহ যাবতীয় ব্যৱস্থা গ্ৰহণ কৰিছে বুলি এক সূত্ৰই প্ৰকাশ কৰিছে ।