নিয়মীয়া বাৰ্তা, ১৮ ফেব্ৰৱাৰীঃ বঙাইগাঁও জিলাৰ যোগীঘোপা থানাৰ অন্তৰ্গত বোৱালীমাৰীত এক বিধ্বংসী অগ্নিকাণ্ড। অগ্নিকাণ্ডত দুটা পৰিয়ালৰ চাৰিটা বাসগৃহ সম্পূৰ্ণৰূপে ভষ্মীভূত হয় ।জানিব পৰা মতে, বোৱালীমাৰীত পাহাৰৰ দাতিত থকা বক্কাৰ আলীৰ এটা বাসগৃহত বিয়লি অগ্নিকাণ্ডৰ সূত্ৰপাত হয় । এই জুয়ে নিমিষতে দাতি-কাষৰীয়া আন বাসগৃহ সমূহলৈ বিয়পি পৰে । লগে লগে স্থানীয় লোকসকলৰ মাজত হুৱা-দুৱা লাগে । স্থানীয় লোকে জুই নুমুৱাবলৈ অশেষ চেষ্টা কৰে যদিও দাউদাউকৈ জ্বলি উঠা জুইত বক্কাৰ আলী আৰু জুৰাণ আলীৰ চাৰিটা বাসগৃহ সম্পূৰ্ণৰূপে জ্বলি ছাই হয় । অগ্নিকাণ্ডত পৰিয়াল দুটাৰ প্ৰায় ১২ লক্ষাধিক টকাৰ ক্ষতি হয় বুলি জনা গৈছে। ইপিনে ঘটনাস্থলী অতি দুৰ্গম আৰু পথছোৱা অধিক ঠেক হোৱা বাবে তাত অগ্নিনিৰ্বাপক বাহিনীৰ গাড়ী উপস্থিত নহল । ঘটনাৰ খবৰ পোৱাৰ পিচত ঘটনাস্থলীত যোগীঘোপা আৰক্ষী উপস্থিত হয় ।
প্ৰেৰকঃ টিংকু চন্দ্ৰ দাস, যোগীঘোপা