নিয়মীয়া বাৰ্তা, ৫ জানুৱাৰীঃ সমাগত ৰাষ্ট্ৰীয় ভোটাৰ দিৱসৰ লগত সংগতি ৰাখি কামৰূপ জিলা নিৰ্বাচনী বিভাগে আয়োজন কৰা জিলা ভিত্তিত আন্তঃ মহাবিদ্যালয় সজাগ ভোটাৰ ফুটবল প্ৰতিযোগিতাত পূৱবংশৰ মহাবিদ্যালয়ে চূড়ান্ত বিজয়ীৰ গৌৰৱ অৰ্জন কৰিছে | ৰঙিয়া নিৰ্বাচনী বিভাগৰ সৌজন্যত তথা কমলপুৰ জনপ্ৰিয় ক্লাবৰ সহযোগত কমলপুৰ মিনি ষ্টেডিয়ামত অনুষ্ঠিত হোৱা উক্ত ফুটবল প্ৰতিযোগিতাৰ আজি অনুষ্ঠিত চূড়ান্ত খেলখনত পূৱবংশৰ মহাবিদ্যালয়ে টাইবেকাৰ পদ্ধতিৰ জৰিয়তে বিদ্যা ভাৰতী মহাবিদ্যালয়ক ৪-৩ গ’লৰ ব্যৱধানত পৰাজিত কৰে | নিৰ্দ্ধাৰিত সময়ত খেলখন গ’লশূন্য ভাৱে সমাপ্ত হোৱাত খেলপৰিচালকে টাইবেকাৰ পদ্ধতিৰ দ্বাৰা খেলৰ ফলাফল নিৰ্ণয় কৰে | জিলাখনৰ মুঠ সাতখন মহাবিদ্যালয়ৰ মাজত অনুষ্ঠিত উক্ত ফুটবল প্ৰতিযোগিতাৰ আজিৰ চূড়ান্ত খেলখনৰ আৰম্ভণিতে কমলপুৰ ৰাজহ চক্ৰৰ চক্ৰ বিষয়া পৰীক্ষিত ফুকনে আনুষ্ঠানিক ভাৱে খেলখন উদ্বোধন কৰি দুয়োদলৰ খেলুৱৈ তথা খেল পৰিচালক সকলৰ লগত চিনাকি হয় | খেলৰ সামৰণিত অনুষ্ঠিত বঁটা বিতৰণী অনুষ্ঠানত বিজয়ী আৰু বিজিত দলদুটাক বঁটাসমুহ প্ৰদান কৰে কামৰূপ জিলাৰ অতিৰিক্ত উপায়ুক্ত ধ্ৰুৱজ্যোতি দাস , কামৰূপ জিলা নিৰ্বাচনী বিষয়া মানসজ্যোতি বৰা, ৰঙিয়া মহকুমা নিৰ্বাচনী বিষয়া ডঃ নীল হাৰিফ কৌশিক, জিলা ক্ৰীড়া বিষয়া ধ্ৰুৱজ্যোতি ডেকা প্ৰমুখ্যে কেইবাগৰাকীও শাৰীৰিক নিৰ্দেশকে |