নিয়মীয়া বাৰ্তা, ২১ এপ্ৰিলঃ হাজো আৰক্ষী থানাৰ অন্তৰ্গত বুল্লুট নতুন চৰাবৰিত নিশা দুৰ্বৃত্তই চালাম আলী নামৰ ব্যক্তিজনৰ পুখুৰীত বিষ দি প্ৰায় তিনি লক্ষাধিক টকাৰ মাছ নিধন কৰা ঘটনাই তীব্ৰ চাঞ্চল্যৰ সৃষ্টি কৰিছে। জানিব পৰা মতে,নিশাৰ ভাগত কোনো দূৰ্বৃত্তই চালাম আলীৰ পুখুৰীত বিষ দিয়াৰ ফলত পুৱাৰে পৰা পুখুৰীটোত উপঙি উঠিছে বিভিন্ন প্ৰজাতিৰ কুইন্টলে কুইন্টলে লাখ লাখ টকাৰ মাছ। ইতিমধ্যে পুখুৰীৰ পানীত উদ্ধাৰ কৰা হৈছে দুৰ্বৃত্তই বিষ বান্ধি অনা এটা পলিথিন বেগ। এক বিঘা মাটি কালিৰ পুখুৰীত দুবছৰ ধৰি মাছ পালন কৰি আহিছিল চালামে। আত্মনিৰ্ভৰশীল হোৱাৰ স্বাৰ্থত চালাম আলীয়ে গঢ়িছিল মীন পালনৰ সপোন। কিন্তু এই ঘটনাৰ পাছতে এতিয়া পুখুৰীৰ পাৰত হিয়া ধাকুৰিকান্দিব লগীয়া হৈছে মৎসপালক চালাম আলী আৰু পৰিয়ালে।