ৰহা গড়মাৰী ৰাষ্ট্ৰীয় ৩৭ নং ঘাইপথত নকল টকা সৰবৰাহকাৰীলৈ আৰক্ষীৰ গুলী! প্ৰায় ৫০ লাখ টকা সহ ৩ আটক

নিয়মীয়া বাৰ্তা, ২১ এপ্ৰিল: নগাঁও জিলাৰ ৰহা আৰক্ষী থানাৰ অন্তৰ্গত গড়মাৰীত ৰাষ্ট্ৰীয় ৩৭ নং ঘাইপথত আজি  দিনৰ পোহৰতে আৰক্ষীয়ে নকল টকা সৰবৰাহকাৰীলৈ গুলীচালনা কৰা ঘটনাই তীব্ৰ চাঞ্চল্য সৃষ্টি কৰিছে। আৰক্ষীয়ে উক্ত জালনোট সৰবৰহাকাৰী সকলৰ পৰা প্ৰায় পঞ্চাশ লাখ নকল টকাসহ তিনিটা সৰবৰাহকাৰী আটক কৰে। অন্যহাতে আন এটা অপৰাধী পলাবলৈ সক্ষম হয়। জানিব পৰা মতে এক গোপন সুত্ৰৰ পম খেদি নগাঁও জিলাৰ উপ আৰক্ষী অধীক্ষক দিপ্তী মালীৰ নেতৃত্বত এক বৃহত  আৰক্ষী দলে তিনিটা দলত বিভক্তহৈ উক্ত জালনোট সৰবৰাহকাৰী দলটোক কৰায়ত্ত কৰিবলৈ কিছুদিনৰ পৰা অভিযান চলাই আছিল।

সেইমৰ্মে আজি লাভ কৰা গোপন খবৰৰ ভিত্তিত  ৰাষ্ট্ৰীয় পথত নকল টকা সৰবৰাহকাৰীৰ বিৰুদ্ধে অভিযান চলায়। এই অভিযানৰ সময়ত  তিনি সৰবৰাহকাৰীয়ে AS2A G 4379 নম্বৰৰ এখন এল্ট’ কাৰেৰে নকল টকা লৈ নগাঁৱৰ ফালৰ পৰা আহি ৰহা পাৰ হওঁতেই আৰক্ষীয়ে পিচে পিচে গৈ আগচি ধৰে। কিন্তু সৰবৰাহকাৰীকেইটাই বাইকত থকা এজন আৰক্ষীক খুন্দিয়াই পলাবলৈ লওঁতেই আৰক্ষীয়ে কেইবা জাঁই গুলী চলায়।এই গুলীচালনাত এজন সৰবৰাহকাৰী আহত হোৱাৰ লগতে সৰবৰাহকাৰীৰ গাড়ীৰ খুন্দাত এজন আৰক্ষীৰ জোৱানো আহত হয়।

ইপিনে স্থানীয় এক সূত্ৰৰ পৰা জানিব পৰামতে আৰক্ষীৰ গুলী গৈ ৰাষ্ট্ৰীয় পথেৰে আহি থকা এখন এম্বুলেঞ্চত লগাত কথমপি এম্বুলেঞ্চত থকা লোকসকল ৰক্ষা পৰে। আহত এজনক নগাঁও ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰে। আৰক্ষীয়ে আটক কৰা নকল টকা সৰবৰাহকাৰী কেইটাৰ নাম এতিয়াও সদৰী কৰা নাই।