নিয়মীয়া বাৰ্তা, ২ ছেপ্তেম্বৰ ঃ সদৌ অসম ছাত্ৰ সন্থাৰ ৰাজ্যিক কাৰ্যনিৰ্বাহক সভাৰ সিদ্ধান্তমৰ্মে অহা অক্টোবৰ মাহৰ শেষৰ সপ্তাহত সদৌ অসম ছাত্ৰ সন্থাৰ সপ্তদশ সাধাৰণ অধিৱেশনখনি ডিব্ৰুগড় জিলাৰ তৈলনগৰী দুলীয়াজানত অনুষ্ঠিত হ’ব ৷
উল্লেখযোগ্য যে , ১৯৯২ চন অৰ্থাৎ সুদীৰ্ঘ ২৮ বছৰৰ পিছত সদৌ অসম ছাত্ৰ সন্থাৰ অধিৱেশনখনি ডিব্ৰুগড় জিলা ছাত্ৰ সন্থাৰ উদ্যোগত দুলীয়াজান আঞ্চলিক ছাত্ৰ সন্থা আৰু দুলীয়াজানবাসী ৰাইজৰ সহযোগত অনুষ্ঠিত হ’ব । এই সন্দৰ্ভত ডিব্ৰুগড় জিলা ছাত্ৰ সন্থাৰ সভাপতি বুলবুল দত্ত আৰু সাধাৰণ সম্পাদক শংকৰজ্যোতি বৰুৱাই এক প্ৰেছ বিবৃতিৰ জৰিয়তে সদৌ অসম ছাত্ৰ সন্থাৰ সপ্তদশ সাধাৰণ অধিৱেশনখনি সাফল্যমণ্ডিত কৰি তুলিবৰ বাবে ডিব্ৰুগড় জিলাৰ সদৌটি ৰাইজৰ সহযোগিতা কামনা কৰিছে । এই অধিৱেশনখনি সন্দৰ্ভত আলোচনা কৰাৰ লগতে এখন শক্তিশালী অভ্যৰ্থনা সমিতি গঠনৰ উদ্দেশ্যে অহা ৫ ছেপ্তেম্বৰ দিনৰ ২ বজাত ছলাকটকী যুৱক সংঘৰ খেলপথাৰত এখন ৰাজহুৱা সভা আহ্বান কৰা হৈছে ৷ এই সভাত সদৌ অসম ছাত্ৰ সন্থাৰ সভাপতি দীপাংক কুমাৰ নাথ আৰু সাধাৰণ সম্পাদক লুৰীণজ্যোতি গগৈ উপস্থিত থাকিব ৷ সেয়েহে এই সভাত সকলোৰে দিহা পৰামৰ্শ-উপদেশ কামনা কৰি জিলাখনৰ সকলো প্ৰান্তৰ ৰাইজক উপস্থিত থাকিবলৈ বিবৃতিৰ জৰিয়তে আহ্বান জনাইছে সদৌ ডিব্ৰুগড় জিলা ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱা আৰু দুলীয়াজান আঞ্চলিক ছাত্ৰ সন্থাৰ সাধাৰণ সম্পাদক দিপাংকৰ গগৈয়ে ৷