নিয়মীয়া বাৰ্তা, ২৬ মাৰ্চঃ ২৭ মার্চত অনুষ্ঠিত হ’ব লগা প্রথম পর্যায়ৰ নিৰ্বাচনৰ ভােটগ্রহণৰ বাবে নিয়োগ কৰা নিৰ্বাচনী বিষয়া তথা কৰ্মচাৰীৰসকলে এমুঠি খাদ্যৰ বাবে হাহাকাৰ কৰিব লগা হৈছে জোনাইত ৷ উল্লেখ্য যে ১১৪ নং জোনাই বিধানসভা সমষ্টিত প্রিজাইডিং,পোলিং বিষয়াৰ লগতে নিৰাপত্তাৰক্ষী বাহিনীৰ বাবে খাদ্য যোগানত মহকুমা প্ৰশাসনে নিয়োজিত কৰা ঠিকাদাৰসকলে সময়ত পৰ্যাপ্ত খাদ্য যোগান ধৰিব নোৱাৰৰ অভিযোগ উত্থাপিত হৈছে ৷
হাতত ভাতৰ প্লেট লৈ এঘন্টা পৰ্যন্ত ৰৈ থকিবলগীয়া অৱস্থা হৈছে বিষয়া-কৰ্মচাৰীসকলৰ৷ জানিব পৰা মতে, জোনাই সমষ্টিৰ বিভিন্ন নিৰ্বাচনী স্থানলৈ যাব লগা বিষয়া-কৰ্মচাৰীসকলে প্ৰায় এক-দুই ঘন্টা ধৰি এমুঠি খাদ্যৰ বাবে ৰখি থকাৰ পিছতো খাদ্য যোগান ধৰাত মহকুমা প্ৰশাসনে নিয়োজিত কৰা ঠিকাদাৰসকল বিফল হোৱাৰ অভিযোগ উঠিছে।
বিষয়া-কৰ্মচাৰীয়ে অভিযোগ উত্থাপন কৰা মতে খাদ্যৰ লগতে পানী এগিলাচৰ বাবেও হাহাকাৰ কৰিব লগা হৈছে ৷ এনে পৰিস্থিতিত বহু নিৰ্বাচনী বিষয়া-কৰ্মচাৰীয়ে ভাত নোখোৱাকৈয়ে ভোটকেন্দ্ৰলৈ ৰাওনা হৈছে৷
ইফালে ভোট কেন্দ্ৰত নিয়োজিত নিৰাপত্তাৰক্ষীয়ে প্ৰথম পৰ্যায়ৰ ভোট গ্ৰহণৰ বাবে ১১৪নং জোনাই বিধানসভা সমষ্টিৰ বিভিন্ন ভোট কেন্দ্ৰত নিয়োজিত হোৱাৰ সময়ত উচিত মাননি প্ৰদানৰ দাবীত প্ৰতিবাদ সাব্যস্ত কৰা পৰিলক্ষিত হয়।