নিয়মীয়া বাৰ্তা , ২৩ নবেম্বৰ: বঙাইগাঁৱত কাইলৈ অনুষ্ঠিত হ’বলগীয়া কেবিনেট বৈঠকৰ পূৰ্বে মুখ্যমন্ত্ৰীৰ নিৰ্দেশ মৰ্মে আজি ৰঙিয়াত অগপৰ সভাপতি তথা কৃষি মন্ত্ৰী অতুল বৰা উপস্থিত হয় । মন্ত্ৰীগৰাকীয়ে ৰঙিয়াৰ বিভিন্ন উন্নয়নমূলক আঁচনিৰ কাম-কাজ পৰিদৰ্শন কৰে ।
ইয়াৰ পূৰ্বে মন্ত্ৰীগৰাকীয়ে ৰঙিয়াৰ মিলনপুৰস্থিত বিজেপিৰ উত্তৰ কামৰূপ জিলাৰ বিজেপিৰ কাৰ্যালয়ত উপস্থিত হোৱাত স্থানীয় বিধায়ক তথা বিজেপিৰ ৰাজ্যিক সভাপতি ভবেশ কলিতাৰ নেতৃত্বত শাসকীয় দলটোৰ কৰ্মী সকলে উষ্ম আদৰণি জনায় । কাৰ্যালয়ত বিজেপিৰ সভাপতিগৰাকীয়ে মিত্ৰ দলৰ সভাপতিগৰাকীক সম্বৰ্ধনা জনায় । আনহাতে মন্ত্ৰী বৰায়ো সভাপতি কলিতাক সম্বৰ্ধনা জনায় । কাৰ্যালয়ত দুয়োটা দলৰে কৰ্মীৰ সৈতে আলোচনাত মিলিত হোৱাৰ পিছতে কলিতাৰ সৈতে মন্ত্ৰী বৰাই ৰঙিয়া মডেল হস্পিতল পৰিদৰ্শন কৰে । চিকিৎসালয়খনৰ নিৰ্মীয়মান আইচিইউ কক্ষ পৰিদৰ্শন কৰি কাম-কাজৰ বুজ লয় ।
ইয়াৰ পিছতে মন্ত্ৰীগৰাকীয়ে কনিহাৰ এটি এফপিচি পৰিদৰ্শন কৰিবলৈ ৰাওনা হয় । ইফালে সাংবাদিকৰ সৈতে হোৱা বাৰ্তালাপত মন্ত্ৰী বৰাই আগন্তুক পৌৰসভা নিৰ্বাচন সন্দৰ্ভত কয় যে সদ্য সমাপ্ত উপ নিৰ্বাচনৰ দৰে বিৰোধী দল কংগ্ৰেছে মুখ থেকেছা খোৱাটো নিশ্চিত। কাৰণ কংগ্ৰেছ এতিয়া নিশকটীয়া , কংগ্ৰেছক আৰু এতিয়া মানুহে বিশ্বাস নকৰে। কিন্তু ইয়াৰ বিপৰীতে অগপ আৰু মিত্ৰ দলসমূহৰ ফলাফল খুবেই ভাল হব। কাৰণ মিত্ৰজোঁটৰ চৰকাৰখনে ৰাজ্যত আশানুৰূপ ধৰণে উন্নয়ন কৰিবলৈ সক্ষম হৈছে । বিশেষকৈ মুখ্যমন্ত্ৰী ডঃ হিমন্ত বিশ্ব শৰ্মাৰ নেতৃত্বত এক আমুল পৰিবৰ্তন হৈছে । ৰাইজে সু-শাসনৰ সুফল পোৱাৰ লগতে দ্ৰুত গতিত কল্যাণমূলক কাম-কাজসমূহ চলি আছে বুলি তেওঁ দোহাৰে ।
input: ফাৰুক হুছেইন , ৰঙিয়া