মুখ্যমন্ত্ৰীৰ সাহাৰ্য্য পুজিলৈ ২১ হাজাৰ টকা প্ৰদান কলিয়াবৰ জিলা বিজেপিৰ সভাপতিৰ

নিয়মীয়া বাৰ্তা  ২৮ মেঃ নগাঁও জিলাৰ চামগুৰি সমষ্টিত প্ৰতি দিনে ক’ভিড আক্ৰান্ত ৰোগীৰ সংখ্যা বৃদ্ধি হোৱা পৰিলক্ষিত হৈছে ৷চামগুৰি খণ্ড প্ৰাথমিক স্বাস্থ্য কেন্দ্ৰৰ অধীনৰ বিভিন্ন স্থানত ৬ শতাধিকৰো অধিক লোক আক্ৰান্ত হোৱা বুলি জানিব পৰা গৈছে ৷ ক’ভিডত আক্ৰান্ত হোৱা প্ৰায় ৰোগী বৰ্তমান ঘৰত আছুতীয়াকৈ থকাৰ লগতে কোনো কোনো ৰোগী বিভিন্ন চিকিৎসালয়ত চিকিৎসাধীন হৈ আছে ৷ক’ভিডত আক্ৰান্ত হৈ নিজ ঘৰত আছুতীয়াকৈ থকা ৰোগীৰ পৰিয়াল সমূহৰ লগতে কন্টেইনমেন্ট জ’নত আৱদ্ধ হৈ পৰা লোক সকলক আজি কলিয়াবৰ জিলা বিজেপিৰ সভাপতি অনিল শইকীয়াৰ নেতৃত্বত এটা সজাতি দলে ঘৰে ঘৰে গৈ খাদ্য সামগ্ৰী বিতৰণ কৰে ৷

ক’ৰোনা ৰোগীৰ চিকিৎসাৰ বাবে কলিয়াবৰ জিলা বিজেপিৰ সভাপতি অনিল শইকীয়াই দুদিন পূৰ্বে ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মাৰ হাতত মুখ্যমন্ত্ৰীৰ সাহাৰ্য্য পুজিলৈ ২১ হাজাৰ টকা প্ৰদান কৰাৰ পিছত আজি চামগুৰি সমষ্টিৰ অন্তৰ্গত বিভিন্ন স্থানত থকা ক’ৰোনা ৰোগী সকলৰ ওচৰত উপস্থিত হৈ স্বাস্থ্যৰ বুজ লোৱাৰ লগতে খাদ্য সামগ্ৰী বিতৰণ কৰে ৷

চামগুৰি সমষ্টি অন্তৰ্গত পানীগাওঁ হয়বৰগাঁও ব্ৰহ্মচাৰী সত্ৰ ভেলেউগুৰি শিঙিয়া হেমাৰবড়ী চামগুৰি ৰঙাগড়া আমলখি আদিকে ধৰি বিভিন্ন স্থানত থকা ক’ৰোনা ৰোগীৰ পৰিয়াল সমূহৰ ওচৰত কলিয়াবৰ জিলা বিজেপিৰ সভাপতি অনিল শইকীয়া আৰু বাজিয়াগাওঁ মণ্ডল বিজেপিৰ সভাপতি প্ৰানজিৎ বৰা উপস্থিত হৈ চাউল দাইল মিঠাতেল আলুকে ধৰি অন্যান্য শাক পাচলিৰ টোপোলা বিতৰণ কৰাৰ লগতে মাস্ক আৰু চেনিটাইজাৰো বিতৰণ কৰে ৷ক’ৰোনা আক্ৰান্ত হোৱা পৰিয়াল সমুহৰ লগত কলিয়াবৰ জিলা বিজেপিৰ সভাপতি গৰাকীয়ে মত বিনিময় কৰে ৷লগতে ক’ৰোনা আক্ৰান্ত হোৱা ৰোগী সকলৰ বিশেষ কিবা অসুবিধা হলে সম্পূৰ্ণ সহায় সহযোগিতা কৰা হব বুলি সংবাদ মাধ্যমক জানিবলৈ দিয়ে ৷